Qashqadaryoda marhum sportchi Kamoliddin Rasulov xotirasiga bag‘ishlangan xotira turniri bo‘lib o‘tdi

Qashqadaryo viloyatining Shahrisabz tumanida marhum sportchi, 2012-yilda o‘tkazilgan sambo bo‘yicha o‘smirlar o‘rtasidagi jahon chempionati g‘olibi Kamoliddin Rasulov xotirasiga bag‘ishlangan turnir bo‘lib o‘tdi. Bu haqda “Daryo”ga marhumning yaqinlari xabar berdi.

Ma’lum bo‘lishicha, xotira turniri 2022-yilning 9-may kunlari Shahrisabz tumanidagi Bolalar va o‘smirlar sport maktabida bo‘lib o‘tgan bo‘lib, unda Surxondaryo, Buxoro, Samarqand va Toshkent shahridan kelgan 200 nafar polvon ishtirok etgan.

“Qashqadaryo viloyati hokimligi, viloyat sportni rivojlantirish boshqarmasi, viloyat Kurash federatsiyasi hamkorligida o‘tkazilgan xotira turnirida nafaqat qashqadaryolik polvonlar, respublikamizning ko‘plab hududlaridan kelgan polvonlar ishtirok etdi va o‘zaro bellashdi”, — deydi “Daryo”ga axborot bergan marhumning turmush o‘rtog‘i.

Qo‘shimcha qilinishicha, 3 ta vazn toifasida g‘olib bo‘lgan polvonlarga esdalik sovg‘alari va Kamoliddin Rasulov rasmi tushirilgan maxsus medallar topshirilgan.

Eslatib o‘tamiz, sambo bo‘yicha jahon chempioni 29 yoshli Kamoliddin Rasulov 2021-yilning 13-sentabr kuni soat 21:30 da Toshkent shahrining Uchtepa tumanidagi ko‘p qavatli uylar oldida boshqa bir sportchi tomonidan pichoqlab o‘ldirilgandi. Bosh prokuratura axborot xizmatining rasmiy ma’lumotida chempion yigitning pichoqlanishiga uning gumonlanuvchi tanishiga “Humo Trop” vitaminini tavsiya qilgani, oqibatda esa gumonlanuvchining sog‘lig‘i yomonlashgani, shifokorlar bu kasallikning davosi yo‘qligini bildirgani xabar berilgandi. Jinoyat ishlari bo‘yicha Uchtepa tuman sudi mazkur qotillik voqeasini 2022-yilning 8-fevral kunidan boshlab ko‘ra boshladi. Mazkur sudda so‘z olgan Shuhrat To‘raboyev marhum Kamoliddin Rasulov tavsiya qilgan vitaminni aytilgan miqdordan ko‘ra ko‘proq iste’mol qilgani sabab sog‘lig‘i yomonlashganini, kechalari issig‘i chiqib, uxlolmaydigan bo‘lib qolganini aytdi. Marhumning xotini Gulnoza Xolmurodova esa qotillik uning ko‘z o‘ngida sodir bo‘lganini, qotillik sodir bo‘lgan paytda hammadan yordam so‘rab, chaqirganini ammo hech kim, hatto PPX xodimlari ham unga yordam bermaganini aytgandi. Sudda so‘z olgan yana bir guvoh A.Q. “Humo Trop” vitamini haqida gap ochib, tanishi Shuhrat To‘raboyevning sog‘lig‘i shu vitamin sabab yomonlashganini bildirdi. PPX xodimlari esa voqea joyiga yetib borganida Shuhrat To‘raboyev ulardan qochib, ko‘p qavatli uy podyezdiga yashiringanini ma’lum qilgandi.

Marhum sportchi Kamoliddin Rasulovning qotiliga dastlab 15 yil muddatga ozodlikdan mahrum qilish jazosi tayinlangandi. Keyinchalik jazo bekor qilinib, qotil 19 yilga ozodlikdan mahrum qilindi.