Йўл ҳаракати хавфсизлиги бош бошқармаси ҳайдовчиликни энди бошлаган фуқаролар бошқараётган машиналарда махсус белги бўлиши шартлиги ҳақида 25 апрель куни хабар тарқатди.
ЙҲХББнинг Telegram-каналида эълон қилинган хабарда шундай дейилади:
«Ҳайдовчиликни энди бошлаган» – «Ҳайдовчилик малакаси етарли бўлмаган» ҳайдовчилик стажи 2 йилдан кам бўлган ҳайдовчилар бошқараётган механик транспорт воситаларида ундов («❗️») белгисининг тасвири туширилган, сариқ рангли, томонлари 150 миллиметр бўлган квадрат кўринишидаги белги бўлиши шарт.Аммо Вазирлар Маҳкамасининг Йўл ҳаракати қоидаларини тасдиқлаш тўғрисидаги қарорида «Ҳайдовчиликни энди бошлаган» таниқлик белгиси ҳайдовчи хоҳишига кўра ўрнатилиши мумкинлиги қайд этилган.
ЙҲХББ 25 апрелдаги хабарини ўчириб ташлаб, 26 апрель куни янги видеохабар чиқарди ва унда аввалги хабардаги хатосини тузатиб, махсус белгини ҳайдовчи хоҳишига кўра машинага ўрнатиш мумкинлиги айтиб ўтилди.
Аввалроқ Ўзбекистонда янги таҳрирдаги Йўл ҳаракати қоидалари тасдиқлангани тўғрисида хабар берилганди. Унга кўра, автомобиль олд ўриндиғида ўтириб хавфсизлик камарини тақмаган йўловчи жаримага тортилиши мумкин, ЙПХ ходимидан дислокацияни сўраш талаби бекор қилинган.
Янги таҳрирдаги Йўл ҳаракати қоидалари 2022 йил 1 майдан бошлаб амалга киритилади.
Изоҳ (0)