Бугун,

  • USD 10940.05
  • RUB 182.26
  • EUR 11121.65

Жиззах вилоятининг Фориш туманида 45 ёшли чўпон маст ҳолда икки нафар шеригини пичоқлаб ўлдирди. Бу ҳақда «Дарё»га вилоят прокуратураси ахборот хизмати раҳбари Муҳаббат Ўрозалиева хабар берди.

Қайд этилишича, қотиллик воқеаси 2022 йилнинг 13 апрель куни содир бўлган.

Аниқланишича, 2022 йилнинг 13 апрель куни Фориш туманидаги «Эгизбулоқ» маҳалласининг Кўктепа ҳудудидаги фермер хўжаликларига қарашли чўпон уйида 45 ёшли чўпон М.Ғ шу ҳудудда чўпонлик қилувчи танишлари — 1977 йилда Пахтакор туманида туғилган Ж.Х ва 1973 йилда туғилган Х.Х. лар билан бирга спиртли ичимлик истеъмол қилган. Базм давомида улар ўртасида жанжал келиб чиққан. Оқибатда 45 ёшли чўпон ошхона пичоғи билан икки шеригининг кўкрак қафасига бир неча маротаба уриб, уларни қасддан ўлдирган. Ҳамда воқеа жойидан яширинган.

«Бироқ олиб борилган тезкор қидирув жараёнлари давомида гумонланувчи шу маҳалланинг ўзида қўлга олинган», — дейди Муҳаббат Ўрозалиева.

Мазкур қотиллик воқеаси вилоят прокурори, вилоят ИИБ бошлиғи, туман сектор раҳбарлари, мутасадди идоралар масъуллари ва кенг жамоатчилик вакиллари иштирокида муҳокама қилинган.

«Йиғилишда вилоят прокурори Исломжон Эргашхўжаев ҳудудда жиноятчиликка қарши курашиш аҳволи ҳақида гапириб, мазкур жиноятларнинг келиб чиқишига сабаб бўлган шарт-шароитларга батафсил тўхталди. Хизмат вазифаларини лозим даражада бажармаган масъуллар фаолиятини танқид қилиб, жиноятчиликнинг олдини олиш юзасидан аниқ кўрсатма ва топшириқлар берди», — дейди вилоят прокурори матбуот котиби.

Қўшимча қилинишича, мазкур ҳолат юзасидан вилоят прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилиб, дастлабки тергов ҳаракатлари олиб борилмоқда.

Изоҳ
Асосий янгиликлар