Бугун,

  • USD 10940.05
  • RUB 182.26
  • EUR 11121.65

Тошкент вилояти Тошкент туманида 7 апрель куни хонадонлардан бирида ноқонуний боқилаётган шер 3 ёшли қизчани тишлаб олгани ҳақида хабар берилганди. Соғлиқни сақлаш вазирлиги қизчанинг ҳозирги аҳволи ҳақида маълумот берди.

Фото: Соғлиқни сақлаш вазирлиги

Фото: Соғлиқни сақлаш вазирлиги

Қайд этилишича, боланинг аҳволи қониқарли, муолажалар режа асосида давом эттирилмоқда.

«Травматология ва нейрохирургия бўлимида шошилинч равишда барча керакли муолажалар ўтказилди. Жумладан, қутуришга қарши антирабик вакцина қўлланиб, жароҳатларга бирламчи жарроҳлик ишловлари берилди», — дейди Мирзо Улуғбек туманида жойлашган 2-сон болалар жарроҳлик клиник шифохонаси бош шифокори Д.Собиров.

Бемор муассасага олиб келинган вақтда умумий аҳволи ўрта оғирликда баҳоланган. Ҳуши жойида бўлса-да, безовта ва қўрқув аломатлари кўзга ташланган. Бош соҳаси рентген ва МСКТ текширувларидан ўтказилган. Патологик синиш аломатлари кузатилмаган. Ёш бемор нейрохирург, невропатолог ва педиатр каби қатор мутахассислар томонидан консультация қилинган.

Шунингдек, унда қўшимча тарзда юқори нафас йўлларининг яллиғланиши белгилари бўлгани учун кўкрак қафасининг рентгенографияси текшируви ўтказилган. Педиатр томонидан ўткир респиратор инфекция, фарингобронхит ташхиси қўйилиб, даволашни давом эттириш ва жароҳатларини назорат қилиб туриш мақсадида торакал жарроҳлик бўлимига ўтказилган.

Ҳозир болакайнинг умумий аҳволи нисбатан қониқарли. Даво муолажалари режа асосида давом эттирилмоқда.

Соғлиқни сақлаш вазирлиги беморнинг аҳволини назоратга олган. 2-сонли клиник шифохонанинг травматология ва нейрохирургия бўлими бошлиғи Исмат Ниғматов ҳамда Республика бош рабиологи Саидворис Ғаниев томонидан беморнинг ҳолати мунтазам тарзда текшириб борилмоқда.

Эслатиб ўтамиз, шернинг эгаси уни Instagram орқали қўшни давлатдан сотиб олган. Жониворнинг эгаси бўлган фуқаро Ш.А. (2004 йилда туғилган)дан ушбу шер боласини олиб келиш, сақлаш каби ҳолатлар бўйича керакли ҳужжатлар сўралганда ҳеч қандай ҳужжатлари йўқлигини айтиб, ўзининг қизиқиши туфайли ҳовлисида боқишини билдирган. Шер боласи суд қарори қабул қилингунига қадар вақтинча сақлаш учун питомникка топширилган.

 Жабрланувчининг онаси ҳолат қай тариқа юз берганини гапириб берган: «Дўконга қизимга сут олиш учун чиққан эдик. Шер орқадан бирданига ҳамла қилиб, боламни тортиб олиб кетиб қолди. Агар ўз вақтида ёрдам кўрсатилмаганда шер боламни еб қўйган бўларди. Худо қанақадир куч берди, устига ташланиб, пастки жағини очишга ҳаракат қилдим, тепа оғзини очишга кимдир ёрдам берди. Шернинг оғзи ичида эди болам, фақат оғрияпти деб йиғлаётганди».

Изоҳ
Асосий янгиликлар