«Ҳайдовчиликка ўқитиш дастурлари бир неча 10 йиллар олдин ишлаб чиқилган». Ўқув дастурлари замонга мослаштирилаётгани айтилди

Ўзбекистонда амалдаги ҳайдовчиликка ўргатиш ўқув дастурлари бир неча 10 йиллар олдин ишлаб чиқилган. Бу ҳақда 18 апрель куни АОКАда бўлиб ўтган матбуот анжуманида ИИВ ЖХД ЙҲХХ бошлиғи ўринбосари Эрали Бозоров маълум қилди, дея хабар бермоқда «Дарё» мухбири.

Эрали Бозоровнинг таъкидлашича, ўқув дастурлари эскирган бўлса-да бир неча йиллар давомида улардан фойдаланиб келинмоқда.

«Тўғрисини айтиб ўтишим керакки, бугунги кунда амалда бўлган ўқув дастурлари бундан бир неча 10 йиллар олдин ишлаб чиқилган. Улар бир-биридан кўчириб келинган ва қайта тасдиқланаверган. Айни пайтда мазкур ўқув дастурларини бугунги замонга мослаштириш ишлари олиб бориляпти. Бунинг учун профессор-ўқитувчилар, мутахассислар жалб қилиниб, ҳар бир банди кўриб чиқилмоқда.

Президентимизнинг 190-сонли қарорида ҳайдовчиларни тайёрлаш, қайта тайёрлаш, уларнинг малакасини ошириш тизимига инновацион технологик педагогикани жорий қилган ҳолда ўқув жараёнини сифат жиҳатдан янги босқичга олиб чиқиш белгиланган. Қарор ижросини таъминлаш бўйича ишлар олиб борилмоқда», – деди ташкилот расмийси.

Эрали Бозоровнинг қўшимча қилишича, ҳозирда ҳайдовчи ва пиёдаларни йўл ҳаракати маданиятига риоя қилиш даражасини ошириш, ҳар қандай қоидабузарлик учун жазо муқаррарлигини таъминлаш ишлари ҳам бошлаб юборилган.

Аввалроқ ички ишлар вазири Пўлат Бобожонов ҳайдовчиларни тайёрловчи автомактаблар тизими ачинарли ҳолатдалиги, уларнинг айримлари сифатли таълим бериш эмас, мўмай даромад топишга интилишини айтганди. Шунингдек, Ўзбекистонда «права»га ўқитиш курслари бир ойда 13,3 фоизга қимматлашгани маълум қилинган.