O‘zbekistonda amaldagi haydovchilikka o‘rgatish o‘quv dasturlari bir necha 10 yillar oldin ishlab chiqilgan. Bu haqda 18-aprel kuni AOKAda bo‘lib o‘tgan matbuot anjumanida IIV JXD YHXX boshlig‘i o‘rinbosari Erali Bozorov ma’lum qildi, deya xabar bermoqda “Daryo” muxbiri.
Erali Bozorovning ta’kidlashicha, o‘quv dasturlari eskirgan bo‘lsa-da bir necha yillar davomida ulardan foydalanib kelinmoqda.
“To‘g‘risini aytib o‘tishim kerakki, bugungi kunda amalda bo‘lgan o‘quv dasturlari bundan bir necha 10 yillar oldin ishlab chiqilgan. Ular bir-biridan ko‘chirib kelingan va qayta tasdiqlanavergan. Ayni paytda mazkur o‘quv dasturlarini bugungi zamonga moslashtirish ishlari olib borilyapti. Buning uchun professor-o‘qituvchilar, mutaxassislar jalb qilinib, har bir bandi ko‘rib chiqilmoqda.
Prezidentimizning 190-sonli qarorida haydovchilarni tayyorlash, qayta tayyorlash, ularning malakasini oshirish tizimiga innovatsion texnologik pedagogikani joriy qilgan holda o‘quv jarayonini sifat jihatdan yangi bosqichga olib chiqish belgilangan. Qaror ijrosini ta’minlash bo‘yicha ishlar olib borilmoqda”, – dedi tashkilot rasmiysi.
Erali Bozorovning qo‘shimcha qilishicha, hozirda haydovchi va piyodalarni yo‘l harakati madaniyatiga rioya qilish darajasini oshirish, har qanday qoidabuzarlik uchun jazo muqarrarligini ta’minlash ishlari ham boshlab yuborilgan.
Avvalroq ichki ishlar vaziri Po‘lat Bobojonov haydovchilarni tayyorlovchi avtomaktablar tizimi achinarli holatdaligi, ularning ayrimlari sifatli ta’lim berish emas, mo‘may daromad topishga intilishini aytgandi. Shuningdek, O‘zbekistonda “prava”ga o‘qitish kurslari bir oyda 13,3 foizga qimmatlashgani ma’lum qilingan.
Izoh (0)