Бош прокуратура Қашқадарё вилоятининг Ғузор туманида 37 ёшли фуқаро ўзини осиб қўйгани, ҳолат юзасидан прокуратура томонидан терговга қадар текширув ҳаракатлари бошланганини маълум қилди.
«Дарё» воқеанинг қўшимча тафсилотларини ҳам ўрганди.
Маълум қилинишича, воқеа 2022 йилнинг 13 апрель куни содир бўлган.
«Дарё» мухбири билан суҳбатлашган манба марҳумнинг ўз жонига қасд қилишига катта миқдордаги қарздорлиги сабаб бўлган бўлиши мумкинлигини айтди.
«У ўша куни уйидан ишга чиқиб кетаётганда хотинига қарзи жудаям кўпайиб кетганини, пул берганлар пулини сўраб тинчлик бермаётганини айтган. Унинг ўлимига катта миқдордаги қарздорлик сабаб бўлган бўлиши ҳам мумкин», — дейди манба.
Ёшлар ишлари агентлигининг вилоят бошқармаси бошлиғи Темур Поёнов марҳумнинг ўз жонига қасд қилишига, унинг ишдан бўшатилгани сабаблиги ҳақидаги маълумотни рад этди.
«У ҳозирги пайтгача ҳам ишдан бўшамаган. Ҳозир, 17 апрель кечки пайт соат 20:30 бўлган бўлса, ҳозир ҳам у бизнинг ишчимиз сифатида рўйхатда турибди. Унинг ишдан бўшатилгани ҳақида маълумот нотўғри», — дейди Темур Поёнов.
Темур Поёновнинг маълумот беришича, марҳум Ёшлар ишлари агентлигининг «Совбоғ» маҳалласидаги вакили сифатида 2021 йилнинг ноябрь ойидан бери ишлаб келган.
«Котиб сифатида ишлаган пайтида қўни-қўшниларидан, таниш-билишларидан арзимаган пул қарз олган. Бу ҳолат кўп бўлгани боис, қарз берувчилар сони ҳам кўпайган ва ундан пул талаб қилинган ҳолат ҳам кўпайган. Бу эса унинг руҳий ҳолатига таъсир қилган бўлиши мумкин», — деди «Дарё» манбаси.
Бош прокуратура ахборотида марҳуманинг уч нафар фарзанди борлиги, у қўшнисининг яшамайдиган хонадонида ўзини-ўзи осиб қўйгани хабар берилган. Шунингдек, текшириш давомида марҳум охирги вақтларда кўп спиртли ичимлик истеъмол қилишга ружу қўйгани қўшимча қилинган.
Марҳумнинг ўлим сабабига аниқлик киритиш мақсадида суд-тиббий экспертизаси тайинланган.
«Дарё» манбасининг қўшимча қилишича, Ғузор тумани прокуратураси 2022 йилнинг 17 апрель куни мазкур воқеада бирор бир кишининг ҳаракатида жиноят аломатлари йўқлигини инобатга олиб, иш юзасидан жиноят иши қўзғатишни рад этган.
Аввалроқ Қашқадарё вилоятининг Нишон тумани «Ойдин» маҳалласида яшовчи вояга етмаган мактаб ўқувчиси 22-март куни ўзини осиб ўлдиргани, Ангрен шаҳрида ИИБ ходими ҳам ўз жонига қасд қилгани, Сурхондарёда эса туман ИИБ бошлиғининг собиқ ўринбосари ўзини осиб, жонига қасд қилгани хабар берилганди.
Изоҳ (0)