O‘zbekiston yo‘llarida: Surxondaryoda Nexia’da 3 kishi yonib ketdi, Xorazmda 6 ta avtomobil ishtirokida YTH sodir bo‘ldi

So‘nggi kunlarda yo‘llarida sodir bo‘lgan yo‘l-transport hodisalari tafsilotlarini taqdim etamiz.

Samarqandda Spark urib yuborgan 9 yoshli qiz vafot etdi

Holat 11-aprel kuni Samarqand viloyati Narpay tumani hududidan o‘tgan yo‘lda sodir bo‘lgan. Tezlikda harakatlanib kelayotgan Spark avtomashinasi S.ni (9 yoshli) urib yuborgan. Oqibatda jabrlanuvchi shifoxonada vafot etgan.

“Oilam bilan qaytayotgandim. Yo‘lda ehtiyotsizlik oqibatida voyaga yetmagan qizaloqni urib yubordim. O‘zim shifoxonaga olib bordim, u yerda ko‘rsatilgan tibbiy yordamga qaramay vafot etdi. O‘zimni oqlamoqchi emasman, endi bu ish bilan bir umr yashashga majburman.

Haydovchilardan so‘rayman, yo‘lda e’tiborli bo‘linglar, piyodalarga yo‘l bering, mening kunimga tushmang”, — deydi haydovchi.

Namanganda Damas va “Jiguli” to‘qnashuvida 3 kishi yaralandi

Ma’lum qilinishicha, YTH 5-aprel kuni soat 15:00 larda Namangan—Uychi—Uchqo‘rg‘on yo‘lining 10-kilometrida sodir bo‘lgan. Fuqaro (1995-yilda tug‘ilgan) “VAZ-2106” avtomashinasini boshqarib borayotib, harakat xavfsizligini ta’minlay olmay, qarama-qarshi yo‘nalishga o‘tib ketgan. Qarshisidan harakatlanib kelayotgan haydovchi (1989-yilda tug‘ilgan) boshqaruvida bo‘lgan Damas avtomashinasi bilan to‘qnashuv sodir etgan.

Oqibatda “VAZ-2106” avtomashinasida bo‘lgan 3 nafar yo‘lovchi turli darajada tan jarohati olib, shifoxonaga yotqizilgan.

Holat bo‘yicha Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan.

Namangandda Nexia bilan to‘qnashgan Damas Isuzu’ga borib urildi

Qayd etilishicha, yo‘l transport hodisasi 10-aprel kuni soat 09:00 larda Namangan viloyati “Chorsu” MFY Uychi ko‘chasida sodir bo‘lgan. Fuqaro (1994-yilda tug‘ilgan) Nexia-3 avtomashinasini boshqarib borayotib, harakat xavfsizligini ta’minlay olmay, haydovchi (1995-yilda tug‘ilgan) boshqaruvida bo‘lgan Damas avtomashinasiga borib urilgan. So‘ng boshqaruvni yo‘qotib, yo‘l chetida to‘xtab turgan Isuzu avtobusning orqa tomoniga urilgan.

YTH oqibatida Damas avtomashinasi haydovchisi chap son suyagini sinishi tashxisi bilan shifoxonaga yotqizilgan.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan.

Andijonda 5 yoshli bolani urib yuborgan haydovchi voqea joyidan qochib ketdi

Holat 16-aprel kuni soat 19:10 atrofida Andijon viloyati Jalaquduq tumani “Yorqishloq” hududida sodir bo‘lgan. Cobalt avtomashinasi haydovchisi 5 yoshli qarovsiz qoldirilgan voyaga yetmagan bolani urib yuborgan. Haydovchi bolaga yordam ko‘rsatmay, voqea joyidan qochib ketgan.

Shifokorlar yordamida bolaning hayoti saqlab qolingan.

YTH yuzasidan surishtiruv ishlari olib borilmoqda.

Xorazmda mast haydovchi sabab 6 ta avtomobil ishtirokida YTH sodir bo‘ldi

Urganch shahrining Xonqa ko‘chasida sodir bo‘lgan. Yuk avtomashinasi haydovchisi spirtli ichimlik ichgan. Oqibatda atrofidagi 5 ta mashina bilan to‘qnashgan.

Hodisa oqibatida jabrlanganlar yoki halok bo‘lganlar yo‘q. Holat yuzasidan tegishli tartibda hujjatlar rasmiylashtirilgan.

Surxondaryoda Nexia-3 yonib ketishi oqibatida 3 kishi halok bo‘ldi.

YTH 14-aprel kuni Surxondaryo viloyati Angor tumani hududidan o‘tuvchi 4R-102 avtomobil yo‘lida sodir bo‘lgan. Angor—Jarqo‘rg‘on yo‘nalishida harakatlanayotgan Nexia-3 avtomashinasi haydovchisi harakatlanish chog‘ida boshqaruvni yo‘qotgan va qarama-qarshi tomondan kelayotgan yana bir Nexia-3 mashinasi bilan to‘qnashgan.

Oqibatda avtotransport vositalarining birida yong‘in yuzaga kelgan. Yo‘lovchilar — Q.R. (23 yoshli, erkak), A.Y. (23 yoshli, ayol) va haydovchi O. hayot uchun xavfli bo‘lgan og‘ir tan jarohati olib, voqea joyida halok bo‘lgan.