Навоий вилоятида 9,9 сотих ер майдонини 45 минг доллар эвазига сотишга уринган шахс қўлга олинди. Бу ҳақда «Дарё»га вилоят ИИБ ахборот хизмати раҳбари Ўктам Усмонов хабар берди.
Вилоятнинг Кармана туманида яшовчи тадбиркор Ў.Ҳ. ўзига давлат-хусусий шерикчилик шартлари асосида сунъий қопламали футбол майдончаси ва ёрдамчи бино объектини қуриш учун берилган 9,9 сотих ер майдонини фуқаро А.О.га савдо мажмуаси қуриш учун 45 минг долларга сотишга уринган. Ва у харидорга мажмуани қуриб бўлгач, ерни ҳокимият ва архитектурада ишловчи танишлари орқали расмийлаштириб беришини ҳам ваъда қилган. 13 апрель куни ДХХнинг вилоят бошқармаси ҳамда вилоят прокуратураси ҳамкорлигида ўтказилган тезкор тадбирда ер сотувчи келишилган пулнинг 30 минг долларни олган вақтида қўлга олинган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
Аввалроқ Самарқандда 40 сотих ерни 20 минг долларга сотишга уринган шахслар қўлга олингани, Тошкент вилоятининг Бўстонлиқ туманида эса мактабгача таълим муассасаси ва савдо-маиший хизмат кўрсатиш мажмуалари қурилиши учун ажратилган 40 гектар ерни 3 миллион долларга сотишга уринганлар ва Самарқандда ерни ноқонуний сотмоқчи бўлган шахс ушлангани хабар берилганди.
Мавзуга доир:
- Фарғонада 50 сотих ерни 25 минг долларга ноқонуний сотмоқчи бўлган МЧЖ бошлиғи ушланди
- ДХХ Бўстонлиқда от спортига ажратилган 25,4 гектар ерни 1,5 млн долларга сотмоқчи бўлган шахсни қўлга олди
- Бўстонлиқдаги «Бочка» дам олиш маскани ҳудудидан фуқарога 450 минг долларга ер сотмоқчи бўлган шахс ушланди
Изоҳ (0)