Андижон вилоятининг Хўжаобод тумани «Солпи» маҳалласида яшовчи фуқаролар «Дарё»га мурожаат қилиб, ҳудудда майда қора ҳашаротлар тўдаси пайдо бўлганини айтмоқда. «Дарё» мухбири Хўжаобод туманида бўлиб, аҳоли билан суҳбатлашди.

«Солпи» маҳалласининг Саноат 1-тор кўчасида яшовчи Азиза Раҳматованинг айтишича, қора рангдаги ҳашаротлар бир ой аввал дастлаб ўчоқ атрофида пайдо бўлган.

«Аввалига бу ҳашарот ўчоқ тагида, мўри атрофида пайдо бўлди. Мен уни мўридан чиққан қора куя, қандайдир учқун деб ўйлабман. Кейин борган сари кўпайиб кетди. Секин-аста деворларга чиқа бошлади ва деразадан уйга кириб ҳамма ёқда пайдо бўлди. Уйда эса кийим-кечаклар ичига кириб, чақа бошлади. Бу ҳашарот чақаверганидан тўйиб, икки ҳафта синглимникида яшаб келдим. Мен нафақага қараб қолган одамман. Нима қилишни билмай қўшнимдан қарз олиб ‘зооаптека’дан дори олиб келдим. Уйларни дориладим, ҳақиқатда ўлди. Лекин тўлиқ йўқолмади, қайтанга мана шу боғ тарафдан яна бостириб келяпти», — дейди Азиза Раҳматова.

Яна бир фуқаро Мунисхон Йўлдошева ҳашарот ҳақида дастлаб хабар берилганида масъуллар ўрганишга келса, одамлар бунчалик жабр кўрмаган бўлиши мумкинлигини айтмоқда.

«Шуни олдинроқ келиб ўрганишса бўларди-ку. Энди ҳамма жойни ҳашарот босганда келасизларми? СЕСга мурожаат қилинди. Лекин ҳеч ким келиб ўрганмади. Кимдир келиб бунга вақтида чора кўрса, оммавий ахборот воситалари вакилларини чақиришга ҳожат бўлмасди. Бу ҳашаротлар боғдан ўтган», — дейди Мунисхон Йўлдошева.

Вилоят ўсимликлар карантини ва ҳимояси бошқармаси Хўжаобод тумани бўлими бошлиғи Рустам Миркомиловнинг айтишича, ушбу ҳашаротлар намгарчиликда кўпайиб, қуёшли кунларда йўқолиб кетади. Уларни оддий оҳак кукуни билан ҳам йўқотиб юбориш мумкин.

«Ўзим ҳам шу маҳаллада яшайман. Ҳашарот пайдо бўлиб, уйларга кираётганини айтишгач, уни қандай қилиб йўқотишни сўрашганда тушунтирганман. Бу ҳашарот энг оддий заҳардан ҳам ўлади. Аслида бу ҳашарот намлик кўпайганда чиқадиган ҳашарот. Намликда кўпаяди. Кунлар исиган сари бу ҳашарот ўз-ўзидан йўқолиб, ҳалок бўлади. Бу ҳашаротларнинг инсонга зарари йўқ. Оддий оҳак кукунини бўлса-да девор атрофига сепиб қўйсак, ўша ернинг ўзида йўқолиб кетади», — дейди Рустам Миркомилов.

Материални тайёрлаш жараёнида «Дарё» мухбири билан боғланган Мунисхон Йўлдошева ўрганиш олиб борилган куни маҳаллага ва уйларга дори сепилганини, натижада ҳашаротлар ўлганини билдирган. Бироқ унинг таъкидлашича, тегишли чоралар кўрилган бўлса-да боғдан чиқаётган ҳашаротлар оқими тўхтамаяпти. Қўшма корхона мутасаддиларидан боғга ҳам дори сепишлари сўралганида улар кўчатлар мева тугмагунча ҳеч қандай кимёвий воситаларни сепмасликларини билдирган.