Франциянинг Париж шаҳрида 2024 йил бўлиб ўтадиган Олимпиада учун бокс бўйича вазн тоифалари тасдиқланди. Бу ҳақда Спортни ривожлантириш вазирлиги матбуот хизмати маълум қилди.
Париж—2024 Олимпиадасида бокс бўйича эркаклар 7 та, аёллар эса 6 та вазн тоифасида ғолиблик учун баҳс олиб боради. Эркаклар ўртасидаги баҳсларда вазн тоифалари сони биттага камайган. Аёллар ўртасида эса аксинча, битта вазн қўшилган.
IBА маълумотларига кўра, Париж Олимпиадасида боксчилар қуйидаги вазн тоифаларида медаллар учун кураш олиб боради:
Эркаклар: -51 кг, -57 кг, -63,5 кг, -71 кг, -80 кг, -92 кг, +92 кг.
Аёллар: -50 кг, -54 кг, -57 кг, -60 кг, -66 кг, -75 кг.
Маълумот учун, Токио Олимпиадасида эркаклар 8 та, аёллар 5 та вазн тоифасида медаллар учун баҳс олиб борган. Ўзбекистон эркаклар ўртасидаги баҳсларда тўлиқ таркибда қатнашган бўлса, аёллар ўртасида уч нафар боксчи Токио—2020 Олимпиадаси йўлланмасини қўлга киритганди. Ўзбекистонлик боксчилар орасида Баҳодир Жалолов +91 кг вазн тоифасида олтин медал соҳибига айланган эди.
Аввалроқ бокс, оғир атлетика ва бешкураш 2028 йилги ёзги Олимпия ўйинлари спорт турларининг дастлабки рўйхатига киритилмагани хабар қилинганди. Агар федерациялар ислоҳотлар ўтказмаса ва камчиликларни бартараф этмаса бу спорт турлари Олимпиада рўйхатидан буткул ўчирилиши айтилганди.
Изоҳ (0)