Fransiyaning Parij shahrida 2024-yil bo‘lib o‘tadigan Olimpiada uchun boks bo‘yicha vazn toifalari tasdiqlandi. Bu haqda Sportni rivojlantirish vazirligi matbuot xizmati ma’lum qildi.
Parij—2024 Olimpiadasida boks bo‘yicha erkaklar 7 ta, ayollar esa 6 ta vazn toifasida g‘oliblik uchun bahs olib boradi. Erkaklar o‘rtasidagi bahslarda vazn toifalari soni bittaga kamaygan. Ayollar o‘rtasida esa aksincha, bitta vazn qo‘shilgan.
IBA ma’lumotlariga ko‘ra, Parij Olimpiadasida bokschilar quyidagi vazn toifalarida medallar uchun kurash olib boradi:
Erkaklar: -51 kg, -57 kg, -63,5 kg, -71 kg, -80 kg, -92 kg, +92 kg.
Ayollar: -50 kg, -54 kg, -57 kg, -60 kg, -66 kg, -75 kg.
Ma’lumot uchun, Tokio Olimpiadasida erkaklar 8 ta, ayollar 5 ta vazn toifasida medallar uchun bahs olib borgan. O‘zbekiston erkaklar o‘rtasidagi bahslarda to‘liq tarkibda qatnashgan bo‘lsa, ayollar o‘rtasida uch nafar bokschi Tokio—2020 Olimpiadasi yo‘llanmasini qo‘lga kiritgandi. O‘zbekistonlik bokschilar orasida Bahodir Jalolov +91 kg vazn toifasida oltin medal sohibiga aylangan edi.
Avvalroq boks, og‘ir atletika va beshkurash 2028-yilgi yozgi Olimpiya o‘yinlari sport turlarining dastlabki ro‘yxatiga kiritilmagani xabar qilingandi. Agar federatsiyalar islohotlar o‘tkazmasa va kamchiliklarni bartaraf etmasa bu sport turlari Olimpiada ro‘yxatidan butkul o‘chirilishi aytilgandi.
Izoh (0)