Тошкент шаҳрида «Наврўз» IV ҳамда Ўзбекистоннинг халқаро нуфузини мустаҳкамлаш ва Шанхай ҳамкорлик ташкилоти доирасидаги маданий-гуманитар алоқаларни қўллаб-қувватлаш мақсадида илк бор Тошкент халқаро ярим марафони бўлиб ўтди. ШҲТ Тошкент халқаро яриммарафони дастурига 3 км ва 21 км, шунингдек, «Наврўз» IV марафони классик марафон (42 км 195 м) ва 10 км масофада ўтказилди.
27 март, якшанба куни бўлиб ўтган марафоннинг старт ва финиш чизиғи Афросиёб ҳамда Бешёғоч кўчалари чорраҳасида (Humo Arena муз саройи), ШҲТ Тошкент халқаро ярим марафонининг йўналиши пойтахтнинг марказий кўчалари, яъни, Нукус, Абдулла Қодирий ва Абай бўйлаб ташкил этилди.
ШҲТ Тошкент халқаро яриммарафони ғолибларининг умумий мукофот жамғармаси 138 миллион сўмни (ярим марафон учун 126 миллион сўм, 3 км масофага 12 миллион сўм) ташкил этди.
«Дарё» мухбирлари мазкур марафондан репортаж тайёрлади.
Бокс бўйича Токио Олимпиадаси чемпиони Баҳодир Жалолов эса мазкур марафон ўзига ёққанини айтди.
«Биз ҳам унда қатнашдик ва медал ҳам беришди. 3 километр масофада югурдик. Бу каби марафонлар қанчалик кўп бўлса, шунча яхши бўлади. Бу спорт инсонларни бир-бирига дўстлаштиради. Бугун барча ғолиб бўламан деб ҳаракат қилди. Мен охирроғида келдим, мусобақалардан сўнг дам олишда эдим, шунинг учун бироз формадан чиқибман», — дейди боксчи.
Миллий олимпия қўмитаси бош котиби Ойбек Қосимов югуриш барча учун қулай бўлган спорт тури эканини билдирди.
«Албатта, югуриш спорти энг оммавий, барча учун маъқул бўладиган спорт тури. Бугунги марафон барчага байрам кайфиятини улашяпти. Ҳаво ҳам жуда ажойиб, кечаги ёмғирдан сўнг бугунги ҳавода югуриш жуда мароқли. МОҚ жамоаси ҳам бугунги марафонда иштирок этди», — дейди у.
Ўзбекистон футбол ассоциацияси биринчи вице-президенти Равшан Эрматов сўнгги кунларда кузатилган ёғингарчиликни эслаб, «бугун қуёшнинг чиқиши жуда яхши бўлгани»ни айтди.
«Халқимиз билан бирга марафонда иштирок этдик. Бу ҳам соғлм турмуш тарзининг тарғиботи. Эътибор берсангиз, 1,5—2 йил аввал шундай марафонларни ташкил қилганимизда одамларни ўзимиз керак бўлса уйига бориб олиб чиқардик. Ҳозир 4-5 минг одамнинг ўзи эрталабдан келиб, марафонда югуриш истагини билдиряпти. Бу спорт халқимизнинг кундалик турмуш тарзига айланиб бораётганидан далолат беради. Ўйлаймизки, мана шундай тадбирлар доимий тарзда бўлади. Спорт билан шуғулланиш ишда ҳам ўзининг ижобий таъсирини кўрсатади.
Шанхай ҳамкорлик ташкилоти доирасида ўтаётган марафонда кўпгина миллатларни кўрдик. Ўзбекистон кўп миллатли давлат ва албатта, юртимиз қанчалик даражада дўстликни, ҳамкорликни тарғиб қиладиган мамлакат эканлигини кўрсатяпмиз», — дейди Эрматов.
3 км масофага югуриш
Эркаклар:- Ҳасан Мирсоатов
- Виктор Цуренко
- Диёрбек Аҳмедов
3 км масофага югуриш
Аёллар:- Шоҳсанам Хуррамова
- Ойзира Жўракова
- Даря Антропова
3 километр масофада қизлар ўртасида 1-ўринни эгаллаган Шоҳсанам Хуррамова спортнинг енги атлетика тури билан 4 йил давомида шуғулланиб келишини айтди.
«Ўтган вақт мобайнида кўплаб ютуқларга эришдим. Халқаро мусобақалар ғолибаси, Ўрта Осиё чемпиони, Ўзбекистон терма жамоаси аъзоси ҳисобланаман. Бугунги марафон жуда ҳам ажойиб бўлди. Об-ҳаво ҳам айни югуриш учун қулай бўлди. Бу каби марафонларда учинчи бор иштирок этдим. Доим юқори ўринларни эгаллаганман», — дейди у.
10 км масофага югуриш
Эркаклар:- Бекзод Бойматов (Сурхондарё) – 35:03
- Отабек Файзуллаев (Сурхондарё) – 35:47
- Азизбек Насимов (Самарқанд) – 36:26
- Дилноза Усмонова (Андижон) – 43:29
- Гўзал Муҳаммадвалиева (Наманган) – 44:22
- Фарида Тўлқинбекова (Андижон) – 44:53
Ярим марафон
Эркаклар:- Нурсултан Кенешбеков (Қирғизистон) – 1:04,28
- Шоҳрух Давлатов (Ўзбекистон, Сурхондарё) – 1:04,40
- Отабек Тошқувватов (Ўзбекистон, Самарқанд) – 1:07,58
- Азиза Мирзаакбарова (Ўзбекистон, Андижон) – 1:15,20
- Мария Коробиская (Қирғизистон) – 1:16,47
- Ситора Қурбонова (Ўзбекистон, Фарғона) – 1:24,43
Марафон (42 км 195 м)
Эркаклар:- Иля Тяпкин (Қирғизистон) – 2:21,42
- Закирилло Маматқулов (Ўзбекистон, Фарғона) – 2:22,05
- Владислав Мамедов (Ўзбекистон, Тошкент вил.) – 2:23,18
- Гулшаной Сатторова (Қирғизистон) – 2:34,50
- Екатерина Тунгускова (Ўзбекистон) – 2:39,28
- Тамилла Кучкарова (Ўзбекистон) – 3:11,23
Изоҳ (0)