Олимжон Мирзаев маданият вазири ўринбосари лавозимидан кетди

Олимжон Мирзаев бошқа ишга ўтиши муносабати билан маданият вазирининг ўринбосари лавозимидан озод этилди. Бу ҳақда Маданият вазирлиги хабар қилди.

Қайд этилишича, унинг ўрнига Муроджон Мажидов тайинланган. Бунгача у Вазирлар Маҳкамасида масъул ходим сифатида фаолият юритиб келган.

Маълумот учун, Олимжон Мирзаев 1981 йил 27 сентябрда Самарқанд вилояти Каттақўрғон шаҳрида туғилган. 2001 йил Тошкент электротехника алоқа институтини, 2003 йил Тошкент ахборот технологиялари университетини тугатган. Маълумоти бўйича телекоммуникация технологиялари, рақамли техника ва бошқарув тизимлари мутахассиси.

У 2017-2018 йилларда «Ахборот хавфсизлигини таъминлаш маркази» давлат муассасаси директорининг биринчи ўринбосари, 2018—2019 йилларда Ахборотлаштириш ва телекоммуникациялар соҳасида назорат бўйича давлат инспекцияси қошидаги «Техник кўмаклашиш маркази» ДУК директорининг биринчи ўринбосари бўлиб ишлаган.

Олимжон Мирзаев 2019 йилдан 2020 йил октябрига қадар «Киберхавфсизлик маркази» давлат унитар корхонаси директори ўринбосари сифатида ишлаган. Шу кунга қадар маданият вазирининг маданият муассасалари ва ҳаваскорлик санъатини ривожлантириш, рақамлаштириш, ахборот технологиялари ва таълим муассасалари бўйича ўринбосари сифатида ишлаган.