Қамчиқ довонидан ўтган автомобиль йўлининг 233–248-километрлари оралиғида 22 март куни майдалаб қор ёғмоқда. Бу ҳақда Йўл ҳаракати хавфсизлиги хизмати хабар қилди.
Қайд этилишича, барча ҳайдовчилардан об-ҳаво шароитини инобатга олган ҳолда, тезликни меъёрдан оширмасдан, оралиқ масофани сақлаб ҳаракатланиш сўралган.
Эслатиб ўтамиз, кеча, 21 март куни ҳам Қамчиқ довонидан ўтган автомобиль йўлининг 236—241-километрлари оралиғида қор ёққан.
Республика Гидрометеорология маркази 22 март, сешанба куни қандай об-ҳаво бўлишини маълум қилганди. Унга кўра, республиканинг тоғли ҳудудларида ҳаво ўзгариб туради, вақти-вақти билан ёғингарчилик (ёмғир, қор) бўлади. Баъзи жойларга туман тушади. Қор кўчиши хавфи бор. Шамол шарқдан 7-12 метр/секунд тезликда эсади. Ҳарорат кечаси 2-7 даража совуқ, кундузи 0-5 илиқ бўлади.
Марказ маълумотига кўра, 23 мартда Ўзбекистон ҳудудига Волгабўйи ҳудудларидан яна нам ва совуқ ҳаво кириб келиши кутилмоқда. Республика бўйича баъзи жойларда ёмғир ёғади, фақат шимолда ёғингарчилик кутилмайди. Кундуз кунги ҳарорат 4-9 даража илиққача пасаяди. Ўзбекистоннинг бир қатор ҳудудларда 24 мартгача қор кўчиш хавфи эълон қилинган.
Мавзуга доир:
- Ўзбекистоннинг айрим ҳудудларида 23 март куни ёмғир ёғиб, қорга айланиши мумкин
- Кучли ёғингарчилик даврида булутларга таъсир кўрсатилса, яна ҳам кўп ёмғир ёғиб, катта талафотлар рўй бериши мумкин — «Ўзгидромет»
- Ўзбекистонда баҳорги совуқлар даврида қишлоқ хўжалиги маҳсулотлари етиштирувчиларни қўллаб-қувватлаш учун тезкор гуруҳлар ташкил этилди
Изоҳ (0)