Ўзбекистон қурилиш материаллари Россия бозоридаги ғарб маҳсулотлари ўрнини эгаллайди

Ўзбекистон ва Россия санкциялар сабаб ғарб компаниялари маҳсулотлари ўрнини тўлдириш мақсадида қурилиш материалларини Россия бозорига етказиб беришни кенгайтиришга келишиб олди. Бу ҳақда Россия Қурилиш вазирлиги матбуот хизмати хабар берди.

Россия қурилиш ва уй-жой хўжалиги вазири Ирек Файзулин Ўзбекистоннинг Россиядаги элчиси Ботир Асадов ўртасида учрашув бўлиб ўтди.

Учрашув давомида хориждан олиб келинадиган қурилиш ресурслари ўрнини Ўзбекистонда ишлаб чиқариладиган материаллар билан қоплаш имконияти кўриб чиқилган. Бунинг учун яқин вақтлар ичида ички бозор эҳтиёжини қондириш имконини берадиган ва ресурслар ўрнини эгаллайдиган қурилиш материаллари рўйхати тайёрланади.

Унинг сўзларига кўра, ҳозирги геосиёсий вазиятда ташқи иқтисодий стратегияни қайта кўриб чиқиш, диверсификация қилиш, айрим ҳолларда ҳамкорлик йўналишларини қайта йўналтириш масалалари муҳим аҳамиятга эга. Биргаликдаги ишлар тармоқларнинг рақобатбардошлигини ошириш, қурилиш материаллари ва ускуналари кафолатланган узоқ муддатли бозорни шакллантириш, шунингдек, янги намуналар ва технологияларни яратиш бўйича илмий тадқиқотларни ривожлантиришга хизмат қилади.

Шунингдек, учрашув давомида Ўзбекистондан мутахассисларни Россия қурилиш объектларига жалб этиш бўйича тажриба лойиҳаси доирасида ходимларнинг ўзаро ҳамкорлиги йўлга қўйиш муҳокама қилинган. Ўзбекистонда Россиядаги қурилиш объектларида талабгир бўлган асосий иш йўналишлари бўйича ўрта махсус таълим базаси шакллантирилган.