Бразилияда Telegram блокланди. Павел Дуров юзага келган вазият учун мамлакат Олий судидан узр сўради
Бразилия Олий суди судьяси Telegram мамлакат ҳукумати билан ҳамкорлик қилишдан бош тортгани сабаб Бразилияда мессенжер фаолиятини блоклаш бўйича қарор чиқарди, деб хабар беради Folha.uol нашри.
Қарор Telegram «турли мамлакатларда суд ва полиция билан ҳамкорлик қилмаслик позицияси билан танилгани, бу эса уни турли контент, жумладан, жиноий ҳамжамиятлар томонидан маълумотлар тарқатиш платформасига айлангани» туфайли қабул қилинган.
«Олий суд судьяси рақамли платформалар ва интернет-провайдерлар мамлакатда Telegram’ни блоклаш механизмларини амалга ошириши тўғрисида қарор чиқарди», — дейилади хабарда.
Январь ойида Бразилия Олий сайлов суди Telegram мессенжерига нисбатан чора-тадбирларни муҳокама қилишга чақирган. Суд маълумотларига кўра, мессенжердан сайлов тизими бўйича ёлғон ахборотларни тарқатишда фойдаланиш мумкин.
Суд раҳбари Telegram раҳбариятига ҳам электрон, ҳам қозоғозда мактуб йўллаган, бироқ жавоб олмаган. Судья мессенжер билан Бразилияда 2022 йилда ўтказиладиган президентлик сайловларини ва уларнинг хавфсиз ўтишини таъминлаш чора-тадбирларини муҳокама қилмоқчи бўлган. WhatsApp, Twitter ва Facebook билан бу борада ҳамкорлик ўрнатилган.
Ўз навбатида Telegram асосчиси Павел Дуров мессенжер блоклангач, Бразилия Олий судидан узр сўраб, юзага келган вазиятни бартараф этиш учун вақт сўраган.
«Корпоратив манзилларимиз ва Бразлия Олий суди ўртасидаги электрон ёзишмаларимизда муаммо юзага келганга ўхшайди. Натижада мазкур тушунмовчилик сабаб суд Telegram’ни блоклаш бўйича қарор чиқарди», — деб ёзади Дуров.
«Ушбу қарордан миллионлаб бразилияликлар азият чекди. Адлия вазирлигининг турли бўлимларига зудлик билан ижтимоий тармоқдан фойдаланиш ҳуқуқини қайтат тиклаш учун йўл қидириш топшириғини бердим», — деб ёзади Торрес Twitter’даги саҳифасига.
Эслатиб ўтамиз, Telegram 2017 йили Индонезияда, 2018 йилда эса Эронда блокланганди. 2021 йилнинг 3 ноябрь куни Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси («Ўзкомназорат») Telegram, YouTube, Instagram, Facebook, «Одноклассники»нинг Ўзбекистондаги фаолиятини чеклади. Кейинроқ Ўзбекистон бош вазири Абдулла Ариповнинг қарорига асосан «Ўзкомназорат» бошлиғи Ғолибшер Зияев нотўғри ва келишилмаган хатти-ҳаракатлари учун эгаллаб турган вазифасидан четлатилгани маълум бўлди ва ижтимоий тармоқларга уланиш тикланди.
Мавзуга доир: Дуров Telegram’да ҳуқуқ-тартибот идоралари ходимлари ҳақида маълумот берувчи каналларни блоклади
