Braziliya Oliy sudi sudyasi Telegram mamlakat hukumati bilan hamkorlik qilishdan bosh tortgani sabab Braziliyada messenjer faoliyatini bloklash bo‘yicha qaror chiqardi, deb xabar beradi Folha.uol nashri.
Qaror Telegram “turli mamlakatlarda sud va politsiya bilan hamkorlik qilmaslik pozitsiyasi bilan tanilgani, bu esa uni turli kontent, jumladan, jinoiy hamjamiyatlar tomonidan ma’lumotlar tarqatish platformasiga aylangani” tufayli qabul qilingan.
“Oliy sud sudyasi raqamli platformalar va internet-provayderlar mamlakatda Telegram’ni bloklash mexanizmlarini amalga oshirishi to‘g‘risida qaror chiqardi”, — deyiladi xabarda.
Yanvar oyida Braziliya Oliy saylov sudi Telegram messenjeriga nisbatan chora-tadbirlarni muhokama qilishga chaqirgan. Sud ma’lumotlariga ko‘ra, messenjerdan saylov tizimi bo‘yicha yolg‘on axborotlarni tarqatishda foydalanish mumkin.
Sud rahbari Telegram rahbariyatiga ham elektron, ham qozog‘ozda maktub yo‘llagan, biroq javob olmagan. Sudya messenjer bilan Braziliyada 2022-yilda o‘tkaziladigan prezidentlik saylovlarini va ularning xavfsiz o‘tishini ta’minlash chora-tadbirlarini muhokama qilmoqchi bo‘lgan. WhatsApp, Twitter va Facebook bilan bu borada hamkorlik o‘rnatilgan.
O‘z navbatida Telegram asoschisi Pavel Durov messenjer bloklangach, Braziliya Oliy sudidan uzr so‘rab, yuzaga kelgan vaziyatni bartaraf etish uchun vaqt so‘ragan.
“Korporativ manzillarimiz va Brazliya Oliy sudi o‘rtasidagi elektron yozishmalarimizda muammo yuzaga kelganga o‘xshaydi. Natijada mazkur tushunmovchilik sabab sud Telegram’ni bloklash bo‘yicha qaror chiqardi”, — deb yozadi Durov.
“Ushbu qarordan millionlab braziliyaliklar aziyat chekdi. Adliya vazirligining turli bo‘limlariga zudlik bilan ijtimoiy tarmoqdan foydalanish huquqini qaytat tiklash uchun yo‘l qidirish topshirig‘ini berdim”, — deb yozadi Torres Twitter’dagi sahifasiga.
Eslatib o‘tamiz, Telegram 2017-yili Indoneziyada, 2018-yilda esa Eronda bloklangandi. 2021-yilning 3-noyabr kuni O‘zbekiston Axborotlashtirish va telekommunikatsiyalar sohasida nazorat bo‘yicha davlat inspeksiyasi (“O‘zkomnazorat”) Telegram, YouTube, Instagram, Facebook, “Odnoklassniki”ning O‘zbekistondagi faoliyatini chekladi. Keyinroq O‘zbekiston bosh vaziri Abdulla Aripovning qaroriga asosan “O‘zkomnazorat” boshlig‘i G‘olibsher Ziyayev noto‘g‘ri va kelishilmagan xatti-harakatlari uchun egallab turgan vazifasidan chetlatilgani ma’lum bo‘ldi va ijtimoiy tarmoqlarga ulanish tiklandi.
Izoh (0)