Евро—2028 катта эҳтимол билан Буюк Британия ва Ирландияда бўлиб ўтади.
Англия, Шимолий Ирландия, Уэльс, Шотландия ва Ирландия бир ой олдин мусобақага мезбонлик қилиш учун биргаликда ариза ташлаганди ва уларга ҳозирча рақобатчи топилмаяпти, дея хабар беради Daily Mail.
Туркия Евро—2016 ва Германияда бўлиб ўтадиган Евро—2024 сайловларида мағлуб бўлгани учун ўз аризасини қайтариб олади.
Россия Европа чемпионатини ўз уйида ўтказиш учун номзод бўла олмайди. ФИФА ва УЕФА терма жамоани барча мусобақалардан четлатди.
2028 йилги Европа чемпионати финал босқичини ўз уйида ўтказиш учун аризалар 2022 йил 23 мартга қадар қабул қилинади.
Расмий равишда мусобақанинг мезбони 2023 йил сентябрь ойида аниқланиши керак, аммо фақатгина битта ариза келиб тушгани ҳисобга олинса, УЕФА қарорни аввалроқ эълон қилиши мумкин.
Евро—2028 да иштирок этувчи терма жамоалар сони 24 тадан 32 тага оширилиши кутилмоқда. Мусобақа камида 12 та стадионда бўлиб ўтади.
Изоҳ (0)