Қатар пойтахти Доҳа шаҳрида спорт гимнастикаси бўйича Жаҳон кубогининг иккинчи босқичи бўлиб ўтмоқда. Ушбу мусобақада дунёнинг 30 та давлатдан келган гимнастлар ғолиблик учун баҳс олиб бормоқда, деб ёзади МОҚ матбуот хизмати.
Мусобақанинг таяниб сакраш машқларининг финал баҳсларида 46 ёшли Оксана Чусовитина энг яхши натижа қайд этди ва якунда олтин медалга сазовор бўлди. Унинг якуний кўрсаткичи 13,433 баллни ташкил қилди.
Ушбу йўналишда 2-ўрин умумий 13,150 балл жамғарган венгриялик Мариа Бачкайга насиб этди. Россиялик 16 ёшли спортчи Виктория Листунова эса 13,133 балл билан кучли учликка якун ясаб берди.
Ўзбек спорти афсонаси бўлган Оксана Чусовитина Олимпиада ўйинларида 8 маротаба қатнашган тарихдаги ягона гимнастикачи ҳисобланади. Шунингдек, у спорт гимнастикаси бўйича 3 карра Жаҳон чемпионидир.
Чусовитина Токио Олимпиадасидан кейин фаолиятини якунлашини маълум қилганди. Бироқ 2021 йилнинг октябрь ойида катта спортга қайтганини эълон қилди.
«Осиё ўйинлари—2022 га тайёргарликни бошлашга қарор қилдим. Фаолиятимни Ўзбекистон учун бирорта ҳам медал қўлга киритмай туриб якунлай олмайман», — деганди ўшанда Чусовитина.
Эслатиб ўтамиз, 2022 йилги Осиё ўйинлари сентябрь ойида бўлиб ўтади.
Изоҳ (0)