Гўшт ва ёғ арзонлашди, мева яна қимматлади. Ўзбекистон бозорида февраль ойида нархлар қандай ўзгарди?
2022 йилнинг февраль ойида инфляция 0,51 фоизни ташкил қилди. Бу ҳақда давлат статистика қўмитаси ҳсиоботида хабар қилинди.
Кетма-кет иккинчи ой мева-сабзавотлар нархи ошиши бўйича етакчилик қилди. Январь ойига нисбатан мева ва ёнғоқлар нархлари 2 фоизга ошган бўлса, балиқ ва бошқа денгиз маҳсулотлари 0,3 фоизга қимматлашди. Сабзавотлар ва дуккаклилар нархи 2,1 фоизга кўтарилган.
Гўшт ва гўшт маҳсулотлари эса аксинча февраль ой давомида 0,1 фоизга арзонлашди. Нархларнинг пасайиши ёғ-мой маҳсулотларида ҳам қайд этилди — 0,2 фоизга. Сут маҳсулотлари ва тухумнинг нархи ҳам 0,1 фоизга тушди.
Ўтган йилнинг февралига нисбатан нархларнинг ўсиш суръати қуйидагича бўлди:
- гўшт маҳсулотлари — 9,6 фоиз;
- донли экинлар ва ёрма маҳсулотлари — 7,5 фоиз;
- балиқ ва бошқа денгиз маҳсулотлари — 11,8 фоиз;
- сут маҳсулоталри ва тухум — 9,6 фоиз;
- ёғлар ва мойлар — 23 фоиз;
- мевалар ва ёнғоқлар — 14,7 фоиз.
Аввалроқ хабар берилганидек, инфляция — Ўзбекистон иқтисодиёти ҳолати ва ҳаётидаги муҳим кўрсаткичлардан бири. 2021 йилда инфляция даражаси сўнгги йилларга қараганда рекорд даражада – 9,98 фоизга паст бўлди. Ҳукумат инфляция даражасини 2023 йилда 5 фоизгача туширишни мақсад қилиб олди. Ушбу кўрсаткич Канада ва Буюк Британия каби мамлакатлар кўрсаткичи ҳисобланади. Инфляция кўплаб кўрсаткичларга таъсир ўтказади. Мисол тариқасида айтадиган бўлсак, инфляция даражаси қанчалик паст бўлса, кредитлар, шу жумладан, ипотека кредитлари ҳам шунчалик пасаяди.
