Go‘sht va yog‘ arzonlashdi, meva yana qimmatladi. O‘zbekiston bozorida fevral oyida narxlar qanday o‘zgardi?
2022-yilning fevral oyida inflyatsiya 0,51 foizni tashkil qildi. Bu haqda davlat statistika qo‘mitasi hsiobotida xabar qilindi.
Ketma-ket ikkinchi oy meva-sabzavotlar narxi oshishi bo‘yicha yetakchilik qildi. Yanvar oyiga nisbatan meva va yong‘oqlar narxlari 2 foizga oshgan bo‘lsa, baliq va boshqa dengiz mahsulotlari 0,3 foizga qimmatlashdi. Sabzavotlar va dukkaklilar narxi 2,1 foizga ko‘tarilgan.
Go‘sht va go‘sht mahsulotlari esa aksincha fevral oy davomida 0,1 foizga arzonlashdi. Narxlarning pasayishi yog‘-moy mahsulotlarida ham qayd etildi — 0,2 foizga. Sut mahsulotlari va tuxumning narxi ham 0,1 foizga tushdi.
O‘tgan yilning fevraliga nisbatan narxlarning o‘sish sur’ati quyidagicha bo‘ldi:
- go‘sht mahsulotlari — 9,6 foiz;
- donli ekinlar va yorma mahsulotlari — 7,5 foiz;
- baliq va boshqa dengiz mahsulotlari — 11,8 foiz;
- sut mahsulotalri va tuxum — 9,6 foiz;
- yog‘lar va moylar — 23 foiz;
- mevalar va yong‘oqlar — 14,7 foiz.
Avvalroq xabar berilganidek, inflyatsiya — O‘zbekiston iqtisodiyoti holati va hayotidagi muhim ko‘rsatkichlardan biri. 2021-yilda inflyatsiya darajasi so‘nggi yillarga qaraganda rekord darajada – 9,98 foizga past bo‘ldi. Hukumat inflyatsiya darajasini 2023-yilda 5 foizgacha tushirishni maqsad qilib oldi. Ushbu ko‘rsatkich Kanada va Buyuk Britaniya kabi mamlakatlar ko‘rsatkichi hisoblanadi. Inflyatsiya ko‘plab ko‘rsatkichlarga ta’sir o‘tkazadi. Misol tariqasida aytadigan bo‘lsak, inflyatsiya darajasi qanchalik past bo‘lsa, kreditlar, shu jumladan, ipoteka kreditlari ham shunchalik pasayadi.
