Украина президенти Владимир Зеленский украиналикларга навбатдаги видеомурожаатини йўллади. Унда айтилишича, мамлакат ҳукумати Европа Иттифоқидан «янги махсус тартиб» асосида Украинани «зудлик билан» таркибига қабул қилишни сўраган.
Аввалроқ Еврокомиссия раҳбари Урсула фон дер Ляен ўз интервьюсида Украина Европа Иттифоқининг бир қисми бўлиши керак, дея фикр билдирганди. Бироқ у мамлакатни зудлик билан иттифоққа қабул қилиш тарафдори эмаслигини айтган.
Ундан олдин эса Зеленский «неча йиллардан бери давом этаётган стратегик мунозарани узил-кесил якунлаш ва Украинанинг Европа Иттифоқига аъзолиги тўғрисида қарор қабул қилиш вақти келганини» таъкидлаган эди.
Янги видеомурожаатида Зеленский, шунингдек, Украина—Россия уруши фонида украиналикларни таслим бўлмасликка чақирган.
«Президентликка кўтарилганимда энди барчамиз президентмиз, дегандим. Чунки давлатимиз учун, гўзал Украинамиз учун ҳаммамиз масъулмиз. Ҳозир эса барчамиз жангчимиз. Ўз ўрнимизда жангчи. Ишончим комилки, ҳар биримиз ғалаба қозонамиз. Украинага шон-шарафлар!», — дейди Зеленский.
27 март куни Украина Россия устидан даъво аризаси билан Гаагадаги Бирлашган Миллатлар Ташкилотининг Халқаро судига шикоят қилгани ҳақида хабар берилганди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)