Беларуснинг Украина билан чегараси яқинида жойлашган Гомел вилояти, Припят дарёси бўйидаги қароргоҳда Россия ва Украина делегациялари ўртасида музокаралар бошланди.
Москвадан келган делегацияга президент ёрдамчиси, Россия собиқ маданият вазири Владимир Мединский бошчилик қилмоқда. Шунингдек, унинг таркибидан Ташқи ишлар вазирлиги, Мудофаа вазирлиги ва президент маъмурияти вакиллари ўрин олган.
Украина делегацияси эса Олий Рададаги ҳукмрон «Халқ ноиби» партияси фракцияси раҳбари Давид Арахамия, Украина мудофаа вазири Олексий Резников ва Украина президенти офиси раҳбарининг маслаҳатчиси Михаил Подолякдан иборат.
Зеленский офисининг ахборотига кўра, музокараларнинг асосий масаласи «зудлик билан ўт очишни тўхтатиш ва Россия қўшинларини Украина ҳудудидан олиб чиқиб кетиш»дир.
«Можаро давом этаётган ҳар соатда Украина фуқаролари, украиналик аскарлар ҳалок бўлаётгани сабабли, биз, албатта, имкон қадар тезроқ бирорта келишувга эришишдан манфаатдормиз. Бу келишувлар, шубҳасиз, ҳар икки томон манфаатларига мос келиши керак», — деди Мединский.
24 февраль куни Украинага Россия босқини бошланганидан бир неча соат ўтиб, Беларусь президенти Александр Лукашенко томонларни Минскда музокара ўтказишга таклиф қилганди. 25 февраль куни Украина президенти офисининг вакили ва Зеленскийнинг ўзи музокара ўтказиш таклифи билан чиқди.
Дастлаб Украина томони музокаралар учун Варшавани муқобил вариант сифатида таклиф қилиб, Минскка учишдан бош тортди. Охир-оқибат томонлар Беларусь-Украина чегарасидаги Гомел вилоятида учрашишга келишиб олди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)