Россиялик миллиардерлар Украина можароси оқибатида 126 млрд доллардан кўпроқ бойлик йўқотди

Forbes ҳисоб-китобларига кўра, 16 февралдан бери россиялик 116 нафар миллиардер 126 млрд доллардан кўпроқ йўқотган. 

24 февраль куни Россиянинг Moex индекси 33 фоизга пасайди ва рубль долларга нисбатан рекорд даражада тушганидан кейин тахминан 71 млрд доллар йўқотилди. АҚШ, Буюк Британия ва Европа Иттифоқи томонидан нишонга олинган миллиардер олигархлар ва бизнесларнинг кичик доирасидан ташқарига чиқадиган санкциялар таҳдиди Россиянинг энг бадавлат кишиларининг бойлигини янада пасайтириши мумкин.

Кремлдаги камида 11 нафар россиялик миллиардернинг ҳар бири 1 млрд доллар ёки ундан кўпроқ маблағ йўқотди.

Россиянинг энг йирик мустақил нефть ишлаб чиқарувчиси бўлган «Лукойл»ни ташкил этган, собиқ Совет нефть вазири Алекперов энг катта маблағ ютқазмоқда. У 4,2 млрд доллар ёки унинг бойлигининг 17,1 фоизини Россия нефть ва газ захиралари тушиб кетгани сабабли йўқотди. Лондон ва Москвада рўйхатга олинган «Лукойл» акциялари ҳужум бошланганидан бери 30 фоиздан кўпроқ арзонлашди.

«Лукойл» 2014 йилда Россиянинг Қримни эгаллаб олиши муносабати билан молиявий ва технологик санкциялар билан «Роснефть» каби давлатга қарашли бошқа Россия энергетика компаниялари қатори АҚШ томонидан санкцияларга дучор бўлган эди. Эндиликда Вашингтон, Брюссель ва Лондон томонидан ҳам санкциялар киритилиши мумкин.

Ўтган ҳафта бошида Британия ҳукумати яна учта россиялик, жумладан Путиннинг собиқ куёви Кирилл Шамаловга нисбатан ҳам санкциялар қўллади. Россиянинг Украинага берган зарбаларидан сўнг Россия банкларининг активларини музлатиш ва россиялик фуқароларга Буюк Британиядаги банк ҳисобларида 66 000 доллардан ортиқ маблағга эга бўлиш тақиқлангани ҳам эълон қилинди.

Европанинг аксарият давлатлари жиддий иқтисодий хатарларга қарамасдан Россияни SWIFT тизимидан узиб қўйишга чақирмоқда.

Британия мухолифатчилари бош вазир Борис Жонсонни россиялик миллиардер Роман Абрамовичнинг мол-мулкини тортиб олишга чақирди. Совет Иттифоқи қулагандан сўнг Россиянинг нефть саноатида бойлик орттирган «Челси» футбол жамоасининг миллиардер эгаси Лондон ва Москва ўртасидаги узоқ давом этган дипломатик зиддиятлар ортидан клуб бошқарувини унинг хайрия фондига топширди. 

Маълумотларга қараганда Абрамович ўтган ҳафта 1 млрд доллардан кўпроқ маблағ йўқотган. 

Аввалроқ рубль тарихдаги энг минимал даражага тушиб кетгани ҳақида хабар берилган эди.