Голливуд фаоллари: Дунёни яхшилашга ҳаракат қилаётган киноюлдузлар (фото)

15-20 йил олдин Голливуд фаолларининг энг ёрқин вакили — актриса Анжелина Жоли маҳаллий аҳоли ва қочқинлар ҳаёти ҳақида кўпроқ билиш ва уларга ёрдам бериш учун шахсан Камбожа, Танзания, Серра-Леон, Кения ва бошқа нотинч минтақаларга саёҳат қилар эди. Ҳозир эса Голливуддаги қизил гиламдан норозилик намойишига ўтишга тайёр бўлган ўнлаб актёрлар бор. Elle нашри нафақат дунёни қутқариш ва яхшилаш мақсадидаги кампанияларининг юзига айланаётган, балки бундай ҳаракатларни бошлаётган ва шахсан иштирок этаётган киноюлдузлар ҳақида маълумот беради.

Эмма Уотсон

Машҳурлиги: биринчи навбатда Гарри Поттер саргузаштлари ҳақидаги фильмлардаги билимдон сеҳргар қиз Гермиона Гренжер роли билан.

Нима учун курашади: гендер тенглиги, аёллар ҳуқуқлари ва ахлоқий мода.

Ҳаётда ҳам Эмма Уотсон кўп жиҳатдан Гермионага ўхшайди: у ҳам қаҳрамонидек адолатни қарор топтириш ва мазлумларнинг ҳуқуқларини ҳимоя қилиш истаги билан яшайди. Агар Гермиона элфлар ҳуқуқлари учун курашган бўлса, Уотсон феминизм ғояларини, яъни гендер тенглиги ва аёллар ҳуқуқларини ҳимоя қилади. 2014 йилда актриса БМТнинг гендер тенглигининг HeForShe бирдамлик ҳаракатига бошчилик қилди, бу ҳаракат эркаклар ҳам аёллар каби гендер тенглигига муҳтож деган ғояга асосланади. HeForShe ташаббуси эркаклар ва ўғил болаларни тенглик учун курашга жалб қилишга чақиради. Бу ҳаракатни АҚШ собиқ президенти Барак Обама ва актёр Мэтт Деймон ҳам қўллаб-қувватлаган.

Актриса HeForShe’дан ташқари гендер тенглиги учун кўплаб ишларни амалга оширган. Мисол учун, 2016 йилда у онлайн китоб клубини яратди, унинг аъзолари ҳар ойда битта феминистик китоб ўқийди ва кейин уни муҳокама қилишади. Бундан ташқари, Эмма баъзан бундай китобларнинг нусхаларини ўзи ташриф буюрган шаҳарларда қолдиради ва Instagram’ида бу «совғалар»ни қандай топиш бўйича маслаҳатлар беради. Эмма Уотсон аёллар ҳуқуқлари фаолларидан ҳам интервью олади. Масалан, у бунинг учун машҳур «Персеполис» график романи муаллифи Маржан Сатрапи ва тинчлик учун Нобель мукофоти совриндори Малала Юсуфзай билан учрашган. Бу ҳали ҳаммаси эмас: Эмма ўзининг Instagram’идан гендер тенглиги ҳақидаги ғояларни ифодалаш учун фаол фойдаланади ва ўзи ҳам ижтимоий тадбирларда қатнашади. Мисол учун, 2017 йилда у онаси билан Нью-Йоркда аёллар ҳуқуқларининг бузилишига қарши кенг кўламли норозилик намойишига чиққан. Эмма учун яна бир муҳим мавзу — ахлоқий мода. Актриса ўзининг ижтимоий тармоқларида доимий равишда кийим-кечак яратиш, яъни фабрика ишчиларининг яхши шароитларда ишлаши ва ишлаб чиқаришнинг экологик тозалигига масъул бўлган брендлар ва дизайнерлар ҳақида гапиради. Актриса тадбирларда имкон қадар тез-тез бундай брендларнинг либосларида чиқишга ҳаракат қилади ва обуначиларини ахлоқий модага эътибор қаратишга ундайди.

Леонардо Ди Каприо

Машҳурлиги: «Титаник» фильмидаги Жек ролидан сўнг Ди Каприо Баз Лурман режиссёрлигидаги «Ромео + Жулиэтта»дан тортиб Алеҳандро Инярритунинг «Омон қолган» фильмига қадар ўнлаб ажойиб лойиҳаларда рол ўяган.

Нима учун курашади: табиат ифлосланиши ва глобал исишнинг олдини олиш.

Леонардо Ди Каприо — замонамизнинг энг нуфузли ва машҳур актёрларидан бири. Кўпгина ҳамкасблари сингари у ўз шон-шуҳратини яхшилик учун ишлатади – имкони борича атроф-муҳит ифлосланишига қарши курашади. Ҳатто 2016 йилги «Оскар» маросимида Ди Каприо ниҳоят «Омон қолган» фильмидаги бош роли учун узоқ кутилган ҳайкалчани қўлга киритганида актёр имкониятдан фойдаланиб, дунёга инсоният томонидан яратилган иқлим ўзгариши хавфини эслатди. Ди Каприо 2014 йилда ҳам 400 000 нафар иқлим фаоллари билан бирга Вашингтонда бўлиб ўтган People’s Climate March намойишида иштирок этди.

Ди Каприонинг ҳозиргача Ер фаровонлиги учун курашга қўшган энг катта ҳиссаси унинг ўзининг Leonardo DiCaprio Foundation жамғармаси бўлиб, БМТ лойиҳаларига иқлим ўзгариши, ноёб ўсимлик ва ҳайвон турларининг йўқ бўлиб кетишига қарши курашади. 2017 йилда Ди Каприо ўз жамғармаси учун рекорд даражадаги йигирма миллион доллар хайрия қилди ва пулларни атроф-муҳитни муҳофаза қилиш лойиҳаларини амалга оширувчи юзта ташкилотга ўтказди. Ди Каприо, шунингдек, атроф-муҳит масалаларига бағишланган форум ва конференцияларда мунтазам иштирок этади. Актёрнинг сўзларига кўра, у бу мавзуга 1990 йилларнинг бошларида, тахминан, «Гильберт Грэйпни нима қийнайди?» фильми устида ишлаётган пайтларида қизиқа бошлаган ва ўшандан бери у доимий равишда йўқолиб кетиш хавфи остида турган ҳайвонлар турлари ҳақида ўқиб, экология ва океанлар тўғрисидаги маълумотларни ўрганади.

Лупита Нионго

Машҳурлиги: Нионго «12 йил қулликда» фильмидаги биринчи ролидаёқ «Оскар»га сазовор бўлган, ўшандан бери у машҳур лойиҳаларда иштирок этади, шунингдек, доимий равишда энг гўзал ва энг замонавий аёллар рўйхатидан тушмайди.

Нима учун курашади: браконьерликни тугатиш ва Африка ёввойи табиатини сақлаш, аёллар ҳуқуқлари, гендер тенглиги, ирқий камситишларга барҳам бериш.

Актриса Кенияда ўсган ва ўз машҳурлигидан одамларни Африкадаги филларни ноқонуний овлаш ва фил суяги савдосига қарши курашга жалб қилиш учун фойдаланади. Нионго нафақат филларни ҳимоя қилади, бундан ташқари Instagram саҳифасида қитъадаги йўқолиб бораётган фаунанинг бошқа турлари билан боғлиқ янгиликларни мунтазам равишда баҳам кўради.

Нионго, шунингдек, Эмма Уотсон каби Нью-Йоркдаги Аёллар намойишида шахсан иштирок этади ва Жессика Честейн сингари Time’s Up дастурини қўллаб-қувватлайди. Албатта, Нионго ирқий камситиш мавзусидан қочиб қутула олмади ва ирқчилик ҳақида гапиришдан ташқари, актриса яна гўзаллик масаласига, яъни унинг хилма-хиллигини тушунтиради. Ёшлигида чиройли терини орзу қилган Нионго яқинда болалар учун «Sulve» номли китоб ёзди, унда ёш китобхонларга гўзаллик терининг ранги, кўз шакли ва бошқа белгиларга боғлиқ эмаслиги ҳақидаги ғояни етказишга ҳаракат қилади.

Жессика Честейн

Машҳурлиги: Честейн «Interstellar», «Асосий мақсад», «Ҳаёт дарахти», «Катта ўйин», «Олтин глобус» каби бир қатор машҳур фильмларда рол ўйнаган.

Нима учун курашади: гендер тенглиги ва аёллар ҳуқуқлари.

Голливуднинг энг ёрқин актрисаларидан бири Жессика Честейн бежизга «Interstellar» фильмида NASA тадқиқотчиси Мерф ёки «Катта ўйин»даги каби ўзининг ерости казиносини ташкил қилган Молли Блум каби ақлли, ўзини ўзи таъминлайдиган аёллар ролини ўйнамайди. Ҳаётда ҳам Честейн худди шундай: аёллар ҳуқуқлари ва гендер тенглигини ҳимоя қилади, стереотиплардан фарқли ўлароқ аёллар илм-фан ва бизнесда эркаклардан кам эмаслигини тушунтиради. 2015 йилда Честейн актёр ва актрисаларнинг иш ҳақини тенглаштириш зарурлигини омма олдида тарғиб қила бошлади – Голливудда аёллар эркакларга қараганда анча кам маош олади. У бу муаммо ҳақида интервьюларда, телекўрсатувларда, ҳатто премьера ва фестивалларнинг қизил гиламларида ҳам гапирди.

Честейн яқинда жинсий зўравонлик тушунчасини ва барча соҳаларда эркаклар ва аёллар учун тенг маош олиш зарурлигини тарғиб қилувчи глобал ташаббус — Time’s Up ташкилотига қўшилди. Актриса ўзининг Instagram’ида ушбу муаммолар ҳақида мунтазам равишда гапира бошлади. Мисол учун, бу йил у ўзи ва Time’s Up’ни қўллаб-қувватловчи бошқа бир қанча актрисалар билан аёллар футбол ўйинига борганлиги ҳақида пост қўйди ва нега АҚШ аёллар терма жамоаси ўйинчилари эркак ўйинчиларга қараганда камроқ маош олишлари ҳақидаги саволни кўтарди. Жессика Честейн, шунингдек, ҳар доим ўз ҳамкасблари — актрисаларни қўллаб-қувватлаши билан танилган. Честейн ҳар йили камида битта аёл режиссёр билан ишлашга ва уни қўлаб-қувватлашга ваъда берган. Унинг аёл режиссёрлар билан биргаликдаги ишларига Ники Каронинг «Ҳайвонот боғи ходимининг хотини», Лив Уллманнинг «Фрекен Юлия» ва Кетрин Бигэлоунинг «Биринчи рақамли мақсад» фильмлари киради.