Ўзбекистонда 2022 йил 1 январдан амалиётга жорий этилган кэшбэк тизими орқали 86,7 минг нафар истеъмолчига 15,1 миллиард сўм кэшбэк тўлаб берилди. Бу ҳақда Давлат солиқ қўмитаси хабар қилди.
Қайд этилишича, ўтган ой мобайнида 276 минг 302 та харид чекига ҳисобланган яна 5,4 миллиард сўмдан ортиқ кэшбэк тўланмаган. Бунга 17 минг 517 та тадбиркорлик субъектларининг солиқ ҳисоботларидаги камчиликлар сабаб бўлган:
- 2 минг 763 та тадбиркор (ҳисобланган кэшбэк 2,6 миллиард сўм) ҳисоботларида чек маълумотлари тўлиқ акс эттирилмаган;
- 12 минг 406 та тадбиркор (ҳисобланган кэшбэк 1,4 миллиард сўм) умуман ҳисобот топширмаган;
- 2 минг 348 та тадбиркорнинг 1 миллион сўмдан юқори солиқ қарзи мавжуд (ҳисобланган кэшбэк 1,4 миллиард сўм).
Эслатиб ўтамиз, 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекининг ҚР код ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.
ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
Изоҳ (0)