O‘zbekistonda 2022-yil 1-yanvardan amaliyotga joriy etilgan keshbek tizimi orqali 86,7 ming nafar iste’molchiga 15,1 milliard so‘m keshbek to‘lab berildi. Bu haqda Davlat soliq qo‘mitasi xabar qildi.
Qayd etilishicha, o‘tgan oy mobaynida 276 ming 302 ta xarid chekiga hisoblangan yana 5,4 milliard so‘mdan ortiq keshbek to‘lanmagan. Bunga 17 ming 517 ta tadbirkorlik subyektlarining soliq hisobotlaridagi kamchiliklar sabab bo‘lgan:
- 2 ming 763 ta tadbirkor (hisoblangan keshbek 2,6 milliard so‘m) hisobotlarida chek ma’lumotlari to‘liq aks ettirilmagan;
- 12 ming 406 ta tadbirkor (hisoblangan keshbek 1,4 milliard so‘m) umuman hisobot topshirmagan;
- 2 ming 348 ta tadbirkorning 1 million so‘mdan yuqori soliq qarzi mavjud (hisoblangan keshbek 1,4 milliard so‘m).
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
Izoh (0)