Олий Мажлис Қонунчилик палатаси депутати Расул Кушербаев ўзининг Telegram’даги канали орқали Наманган вилоятининг Чуст туманида канализация тармоғидан «қон оқаётгани» тасвирланган видеони эълон қилди. Вилоят сув таъминотининг маълум қилишича, ҳолат юзасидан тезкор суриштирув ўтказилган.
Ижтимоий тармоқларда муҳокамага сабаб бўлаётган видеода Чуст тумани «Саримсоқтепа» МФЙдаги канализация тармоғи тасвирланган.
«Мазкур ҳолат тармоқлардаги тиқилиш натижасида келиб чиққан бўлиб, 2022 йилнинг 18 февраль куни аниқланган ҳамда ҳудудий оқова тозалаш бўлимининг Чуст филиали томонидан бартараф этилган, назоратчи томонидан 22 февраль куни визуал текширув ўтказилганда авария ҳолати аниқланмаган», — дейилади муносабатда.
Шунингдек, оқова тармоқларида оқаётган қизил рангли суюқлик қон эмас, тармоққа уланган тозалаш воситалари ишлаб чиқарувчи фабрикадан чиққан кимёвий моддалар таъсирида оқова сувларининг ранги экани аниқланган.
Таъкидланишича, ушбу масала юзасидан қўшимча ўрганиш ўтказилиб, якуни бўйича маълумот берилади.
Изоҳ (0)