Шавкат Мирзиёев 11 февраль куни мамлакатда амалий ташриф билан бўлиб турган Қозоғистон бош вазири Алихан Смаиловни қабул қилди. Бу ҳақда Президент матбуот хизмати хабар қилди.
Қайд этилишича, учрашувда Ўзбекистон билан Қозоғистон ўртасидаги кўп қиррали ҳамкорлик муносабатларини янада ривожлантириш ва кенгайтириш масалалари муҳокама қилинган.
Учрашув аввалида бош вазир Алихан Смаилов давлат раҳбарига Қозоғистон президенти Қосим-Жўмарт Тўқаевнинг саломи ва энг эзгу тилакларини етказган.
2021 йил декабрь ойидаги саммитда Ўзбекистон ва Қозоғистон етакчилари эришган келишувларнинг амалга оширилишини таъминлаш борасида икки мамлакат ҳукуматлари томонидан қабул қилинаётган чоралар кўриб чиқилган.
Товар айирбошлаш ҳажмини орттириш ва унинг кўрсаткичлари мувозанатли бўлишига эришиш учун қулай шарт-шароитлар яратиш, янги саноат кооперацияси ва логистика марказлари ташкил этишни жадаллаштириш, сув, энергетика ва транспорт-коммуникация соҳаларида ўзаро манфаатли ҳамкорликни кенгайтириш, ҳудудлараро мулоқотлар ва маданий-гуманитар алмашинувни фаоллаштириш масалаларига алоҳида эътибор қаратилган.
Изоҳ (0)