Тошкентга қайтаётган трамвай ҳақида пойтахтда яшовчиларнинг фикри қандай?

2016 йили Марказий Осиёдаги энг қадимги ва энг йирик енгил рельсли транспорт тизими – Тошкент трамвайларининг 115 йиллик тарихига нуқта қўйилганди. Бунга Тошкент шаҳрининг ўша вақтлардаги ҳокими Раҳмонбек Усмоновнинг трамвай йўналишлари фаолиятини самарасиз деб топгани сабаб бўлган. Шундан сўнг пойтахтдаги вагонларининг яроқлилари Самарқанд вилоятига етказилган эди.

Ўзбекистон президенти Шавкат Мирзиёев 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деди президент.

Тошкентга трамвайнинг қайтарилиши бўйича пойтахтликларнинг фикри қандай? Ушбу саволга жавоб олиш мақсадида «Дарё» сўровнома ўтказди.

Мазкур сўровномада иштирок этган фуқаролардан бирининг таъкидлашича, «трамвай қайтарилса жуда қулай бўлади. Бошқа бир фуқаро эса «эндиликда талабалар метро, автобусларда тиқилиб, сарсон бўлмаслигини» айтди. Фуқаролардан бири эса «трамвай тез, ҳозирги замон талабларига жавоб берадиган бўлса экологик томондан анча яхши бўлишини» билдирди. Яна бир фуқаро эса трамвайни қайтариш бўйича «керак бўлса ёрдам беришини» қайд этди.

Фуқароларнинг айримлари эса пойтахтга трамвай қайтишининг тарафдори эмас. Улардан бири «трамвай кўчага сиғмай қолишини» айтиб, кўчаларни кенгайтириш кераклигини таъкидлади. Яна бир фуқаро эса «трамвай қайтарилишининг кераги йўқ эканини» билдириб, жумладан, шундай дейди: «Трамвай йўлни тўсади, ҳалақит беради. Мен шу ерда туғилиб ўсганман. Троллейбусни ҳам, трамвайни ҳам кўрганман. Троллейбус симидан чиқиб кетарди, трамвай эса ток йўқ бўлса навбатда туриб қолади». Бошқа бир фуқаро эса «трамвайнинг ‘тақир-туқур’ овози эшитилишини» таъкидлади.

2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Ипподром ўртасида қатновчи 17-йўналиш ёпилганди.

Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди.

«Шаҳар транспорти мавзуси очилганидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимиздаку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — деганди Хайрулла Нуриддинов.