«Мен ер олиб, ер бериш учун келмадим» — Қўрғонтепа ҳокими Элёрбек Набижонов

Андижон вилояти Қўрғонтепа тумани ҳокими Элёрбек Набижонов бир гуруҳ журналист ва блогерлар билан очиқ мулоқот ўтказди.

Мулоқотда «Дарё» мухбири Элёрбек Набижонов ҳоким бўлишидан аввал Қўрғонтепа туманидаги катта корхонанинг эгаси бўлгани ва бу ҳудудда манфаатлар тўқнашувига сабаб бўлмаяптими, деб савол билан мурожаат қилди. Саволга ҳоким Элёрбек Набижонов жавоб берар экан, тадбиркорнинг ҳоким этиб тайинланиши кўпроқ фойда келтираётганини айтиб ўтди.

«Манфаатлар тўқнашуви бўляпти деб айтолмайман. Аксинча, тадбиркор тадбиркорни тушунади. Ҳоким бўлганимда биринчи галда коррупцияга қарши курашишга киришдим. Фермерларни йиғиб, уларга ер олиб, ер бериш учун келмаганимни айтдим. Қайтага, тадбиркор сифатида тажрибаларим билан ўртоқлашишни таклиф қилдим ва шу йўлда ишлаяпмиз. Тадбиркорларга ишлаб чиқаришда янада кўпроқ фойда олиш ва янги технологияларни ўзлаштириш йўлидан боряпмиз. Туманда нима иш қилаётган бўлсам, ривожланган давлатларда кўрганларимни татбиқ этяпман», — деди Қўрғонтепа тумани ҳокими.

Суҳбат давомида Элёрбек Набижонов туман ҳокимларининг сайлов йўли билан тайинланишига ўз муносабатини билдирди.

«Сайловдан умуман қўрқмайман. Фикримча, агар туман ҳокимлигига сайлов бўлса, одамлар мени сайласа керак», — деди у.

Элёрбек Набижонов 2021 йил февраль ойида Қўрғонтепа тумани ҳокими вазифасига тайинланган. Тайинловга қадар Khantex Group МЧЖ кузатув кенгаши раиси бўлган. У 2020 йилда «Шуҳрат» медали билан тақдирланган.