Ижтимоий тармоқларда Бухоро шаҳридаги «Чор Минор» мадрасаси объекти ҳудудида қўйхона ташкил этилгани тасвирланган видео тарқалди. Бухоро вилояти Маданий мерос бошқармаси мазкур ҳолатга муносабат билдириб, видеода акс этган ҳолат ҳақиқатга тўғри келмаслигини маълум қилди.
Ижтимоий тармоқларда тарқалган видеода мадраса ҳудудида бир нечта қўйлар борлиги ва уларни сақлаш учун қўйхона қурилгани тасвирланган. Идора матбуот хизматининг маълум қилишича, вазият 27 январь куни мутасадди ташкилотлар, жамоатчилик ва шу ҳудудда яшовчи аҳоли билан биргаликда жойига чиққан ҳолда ўрганилган.
Ўрганиш натижасига кўра, «Чор Минор» мадрасаси ва унинг атрофидаги ҳудуд айни пайтда озода экани, бу ерда ҳеч қандай қўйхона мавжуд эмаслиги ва видеода акс этган ҳолат ҳақиқатга тўғри келмаслиги маълум бўлган.
«Чор Минор» мадрасаси жойлашган «Алишер Навоий» маҳалла фуқаролар йиғини раиси Шаҳноза Камолованинг сўзларига кўра, аёл икки ярим йилдан буён ушбу маҳаллада ишлаб келмоқда ва бу давр ичида кўрсатилган жойда қўйхона мавжуд бўлмаган, видеодаги ҳолат уч йил олдин кузатилган.
Таъкидланишича, мазкур ҳудуднинг озода ва тартибли сақланиши бўйича фуқаро Мансур Сафаров масъул этиб бириктирилган. Маҳаллий аҳоли ҳам аёлнинг гапларини тасдиқлаган.
«Блогерлардан улуғ аждодларимиздан бизгача етиб келган обидаларнинг нуфузига салбий таъсир этиши ва шу жойда яшовчи аҳолининг қадр-қимматини оёқости қилиши мумкин бўлган, ҳақиқатга зид хабарларни тарқатмасликка ва бу йўналишда тўғридан-тўғри ҳамкорлик қилишга чақирамиз», — дейилади муносабатда.
Шунингдек, вилоят Маданий мерос бошқармаси Ўзбекистон қонунчилигида ҳар қандай асосланмаган маълумотни тарқатишга сабабчи бўлган шахсларга нисбатан тегишли чоралар кўрилиши белгилангани, бунга амал қилмай, асоссиз маълумотлар тарқатувчи шахсларнинг иши ҳуқуқни муҳофаза қилиш органларига тақдим этилишини эслатиб ўтган.
Аввалроқ «Хўжа Порсо» масжиди бузиб ташлангани бўйича иш тергов учун Бош прокуратурага юборилгани, Бухоро амири Сайид Абдулаҳадхоннинг хароба ҳолга келиб қолган ёзги қароргоҳини реставрация қилишга 3,1 миллиард сўм ажратилиши, Бухоро прокуратураси деворининг бир қисми ўпирилиб тушган «Абдуллахон» мадрасаси бўйича жиноят иши қўзғатгани тўғрисида хабар берилганди.
Изоҳ (0)