Вазирлар Маҳкамасининг тегишли қарорига кўра, Шарифбек Ҳасанов Маданий меросни ҳимоя қилиш инспекциясининг бошлиғи этиб тайинланди. Бу ҳақда Туризм ва спорт вазирлиги ҳузуридаги Маданий мерос агентлиги матбуот хизмати хабар берди.
Тайинловга қадар Шарифбек Ҳасанов Вазирлар Маҳкамаси Туризм, спорт, маданият ва оммавий коммуникациялар масалалари котибияти мудирининг ўринбосари — Туризм ва спортни ривожлантириш масалалари шўъбаси мудири лавозимида ишлаган.
Маълумот учун, мазкур инспекция Ўзбекистон президентининг 2021 йил апрелдаги «Туризм, спорт ва маданий мерос соҳаларида давлат бошқаруви тизимини янада такомиллаштириш чора-тадбирлари тўғрисида»ги фармони билан ташкил этилган. Маданий меросни ҳимоя қилиш инспекцияси штат бирликлари Ўзбекистонга оид хориждаги маданий бойликларни тадқиқ этиш марказининг 10 та штат бирлигини қисқартириш ҳисобига шакллантирилган.
Аввалроқ Туризм ва спорт вазирлиги ҳузуридаги Маданий мерос агентлигига раҳбар тайинлангани, Шаҳрисабз, Марғилон ва Хивада Маданий мерос техникумлари ташкил этилиши, Ўзбекистонда моддий-маданий мерос объектларига зарар етказган шахсларга нисбатан жазо чоралари кучайтирилиши тўғрисида хабар берилганди.
Изоҳ (0)