Қозоғистон президенти Қосим-Жўмарт Тўқаев 10 январни оммавий намойишлардан кейин бошланган тартибсизликлар оқибатида ҳалок бўлганлар хотираси учун мотам куни деб эълон қилди. Бу ҳақда Қозоғистон президентининг матбуот котиби Берик Уали Facebook’да пост ёзган.

Фото: «ТАСС»

«Қозоғистон президенти Қосим-Жўмарт Тўқаев мамлакатнинг турли ҳудудларида содир бўлган фожиавий воқеаларда қурбон бўлганлар хотирасини ёд этиш мақсадида 2022 йил 10 январни умуммиллий мотам куни деб эълон қилди», — деб ёзган Берик Уали ижтимоий тармоқдаги саҳифасида.

Қозоғистондаги вазият 2 январь куни Жанаўзен шаҳрида (Манғистов вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Мамлакат бўйлаб интернет узиб қўйилган. Мобил алоқа ҳам деярли ишламаяпти. Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтган. Tengrinews Қозоғистон Ички ишлар вазирлиги маълумотларига таяниб, тартибсизликлар чоғида 8 нафар полициячи ва Миллий гвардия аскари ҳалок бўлгани, яна 317 киши жароҳатлангани ҳақида хабар берган.

6 январда Коллектив Хавфсизлик Шартномаси Ташкилоти (КХШТ) тинчликпарвар кучлари Қозоғистонга жўнатди. 7 январда Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди.

Қозоғистондаги тартибсизликлардан кўрилган зарарнинг умумий миқдори, тахминий ҳисоб-китобларга кўра 91 миллион долларни ташкил этган, шундан 89,8 миллион Олмаота улушига тўғри келади.