Қозоғистон миллий хавфсизлик қўмитаси собиқ раҳбари Карим Масимов давлатга хиёнатда айбланиб ҳибсга олинди

Қозоғистон миллий хавфсизлик қўмитаси собиқ раҳбари Карим Масимов ҳибсга олинди, у давлатга хиёнат қилганликда айланмоқда. Бу ҳақда Қозоғистон МХҚ матбуот хизматига таяниб “Zakon.kz” хабар берди.

Қўмита матбуот хизмати хабарига кўра, Масимов Қозоғистон Жиноят кодексининг 175-моддаси 1-қисми билан давлатга хиёнатда гумонланмоқда ва 6 январда мазкур ҳолат бўйича судга қадар тергов жараёни бошланган. Шунингдек, шу куннинг ўзида Масимов билан бирга бошқа гумонланувчилар ҳам ҳибсга олиниб, вақтинча ушлаб туриш изоляторида сақланмоқда, дея қўшимча қилган Қозоғистон МХҚ.

Тергов ва суриштирувга алоқадор бошқа махфий ахборотлар ошкор этилмайди, дея баёнотга якун ясаган қўмита матбуот хизмати.

6 январда Қозоғистон президенти Қосим-Жўмарт Тўқаев Масимовни МХҚ раҳбари лавозимида озод қилган, шунингдек, қўмита раисининг ўринбосари Ануар Садикулов ҳам ишдан бўшатилганди. Масимов 6 январда бўлиб ўтган Хавфсизлик кенгашининг йиғилишида шахсан иштирок этган.

Аввал Қозоғистон биринчи президенти Нурсултон Назарбоевнинг собиқ маслаҳатчиси Ермуҳамет Ертисбаев мамлакатдаги тартибсизликларни бошлаган кимсалар Тўқаевни ҳокимиятдан четлатишга урингани ҳақида гапирганди. У бундай давлат тўнтаришини режалаштириш ва амалга ошириш юқори лавозимлардаги «сотқинлар»сиз қилиб бўлмаслигини таъкидлаган.

56 ёшли Масимов 2016 йил сентябрь ойида МХҚ раҳбарлигига тайинланган. У турли йилларда бош вазир, президент администрацияси раҳбари ва Қозоғистон президентининг ёрдамчиси каби лавозимларда ишлаган.

Масимов 2007 йилдан 2012 йилгача ҳамда 2014 йил апрелидан 2015 йил апрелигача бош вазир, кейин президентлик сайловларидан сўнг қайта ҳукумат раҳбарлигига сайланиб 2016 йил сентябргача мазкур лавозимда ишлади. Умумий ҳисоблаганда Масимов Қозоғистон 7 йил давомида бош вазир сифатида фаолият олиб борган.

Аввалроқ Қозоғистон ИИВ 4000 нафаргача террорчи ҳибсга олинганини маълум қилгани, Қозоғистон ёнғин ўчириш хизмати ходимлари бутун мамлакат бўйлаб олов ичида қолган 143 нафар одамни эвакуация қилгани ҳақида хабарлар берилган.