Бухоро вилоятида 31 декабрь куни Туркиянинг «Aksa Energi» компанияси томонидан қурилган иссиқлик электро станцияси ишга туширилди. Бу ҳақда Энергетика вазирлиги хабар қилди.
Фото: Энергетика вазирлиги
Маълум қилинишича, газ-поршенли ИЭСнинг қуввати 270 мегаваттни ташкил этади. Ҳозирда мазкур станцияни Ўзбекистоннинг ягона электр тармоғига улаш бўйича ишлар олиб борилмоқда. Станция тез орада тармоққа қувват узатишни бошлайди.
Ушбу станция Бухоро вилоятида биринчиси ҳисобланади. Йилига 2,2 миллиард киловатт/соат электр энергияси ишлаб чиқаради.
Лойиҳа қурилмаларининг фойдали иш коэффициентининг юқорилиги ҳисобига йиллик 260 миллион метр куб табиий газ тежалади. Тежалган табиий газга қўшимча 900 миллион киловатт-соат электр энергияси ишлаб чиқариш имкони яратилади, бунинг натижасида 450 минг хонадон электр энергияси билан таъминланади.
Қурилиш давомида 500 нафар ишчи-ходим фаолият юритган бўлса, лойиҳа ишга тушиши натижасида туманда 100 нафар янги иш ўрни яратилган.
Эслатиб ўтамиз, Шавкат Мирзиёев Бухоро вилоятда шамол, қуёш ва иссиқлик электр станциялари қурилишини айтганди. «1,6 миллиард доллар тўғридан-тўғри хорижий инвестиция ҳисобидан 4 та шамол, қуёш ва иссиқлик электр станцияси барпо этилади. Ушбу станциялар йилига 6,3 миллиард киловатт-соат ёки вилоят эҳтиёжига нисбатан икки баробар кўп электр энергияси ишлаб чиқаради. Жумладан, 2023 йилда Пешку ва Ғиждувонда жами қуввати 1 минг мегаватт бўлган 2 та шамол электр станцияси қурилади», — дея қайд этган давлат раҳбари.
Изоҳ (0)