Бухоро вилояти Ғиждувон туманида 2021 йилнинг 30 декабрь куни фуқаро жаҳл устида ўз ўғлини пичоқлаб ўлдирди. Бу ҳақда «Дарё»га вилоят Ички ишлар бошқарамаси ахборот хизмати раҳбари Шуҳрат Жалолов хабар берди.
Маълум қилинишича, шу куни соат 18:30 атрофида «Денов» маҳалласида яшовчи С.З. (1980 йилда туғилган) спиртли ичимлик ичиб, уйига маст ҳолда кириб келган. Отасининг сурункали ичиб келаверишидан чарчаган ўғли (2004 йилда туғилган) У.Н. отасига танбеҳ берган. Бундан жаҳли чиққан ота аввалига ўғлини ҳақоратомуз сўзлар билан сўккан. Шундан сўнг хонадонда ота ва ўғил ўртасида ўзаро жанжал кўтарилган. Жаҳлини жиловлай олмаган ота ўғлининг қорин соҳасига ошхона пичоғи билан оғир тан жароҳати етказган. Оқибатда У.Н. кўрсатилган муолажаларга қарамай, туман касалхонасида вафот этган.
Ҳолат юзасидан Ғиждувон туман Ички ишлар бошқармаси ҳузуридаги Тергов бўлими томонидан С.З.га нисбатан Жиноят кодексининг 104-моддаси 3-қисми «д» (жабрланувчининг ўлишига сабаб бўладиган қасддан баданга оғир шикаст етказиш) банди билан жиноят иши қўзғатилиб, қамоққа олинган.
Мазкур жиноятни содир этган шахс саккиз йилдан ўн йилгача озодликдан маҳрум қилиш билан жазоланади.
2021 йилнинг 5 июнь куни ҳам Бухоро вилояти Жондор туманида шунга ўхшаш ҳолат содир бўлган. Ота турмуш ўртоғи билан жанжаллашиб, уйига қайтиб келган қизини урушиб, ундан келинлик уйига қайтиб кетишини сўраган. Бундан жаҳли чиққан ўғил отаси билан жанжаллашган, оқибатида ота ўз фарзандини пичоқлаб ўлдирганди.
Изоҳ (0)