«Чекловлар кўпайиб кетди дегани, улар бўлмаслиги керак дегани эмас» — Русланбек Давлетов айрим ижтимоий тармоқлар блокланиши ҳақида

Адлия вазири Русланбек Давлетов «Тошкент ёшлар форуми—2021» доирасида ёшлар билан суҳбатлашди, дея хабар бермоқда «Дарё» мухбири.

Вазир «Дарё» мухбирининг Ўзбекистонда ижтимоий тармоқлар, жумладан, TikTok ва Twitter’нинг блокланиши бўйича берган саволига жавоб берди.

«Ҳаётимизда чекловлар кўпайиб кетди деганимда, бу умумий баҳо бериш натижаси эди. Лекин чеклов бўлиши керак-ку. Чекловлар кўпайиб кетди дегани, чекловлар бўлмаслиги керак дегани эмас. У ҳар доим мақбул даражада бўлиши керак ва ўзининг соҳасига қараб, қонунга қараб бўлиши лозим», — дейди Русланбек Давлетов.

Адлия вазири ўзининг ахборот алмашинуви эркинлиги тарафдорилигини айтди.

«Ахборотни ҳеч қачон чеклаб, унинг устига ўтириб, жиловлай олмаймиз бугунги асрда. Ҳеч қачон қилолмайсиз. Тарих ҳам бунга гувоҳ. Гутенберг 1445 йилда босма дастгоҳни кашф қилган, шу орқали кўпчилик миллатларнинг саводи чиққан. Усмонийлар империяси эса бундан қўрқиб, 18-19-асргача Гутенбергнинг дастгоҳини мамлакатга киритмаган. Бу эса миллатнинг савод бўйича қолоқ бўлишига олиб келган. Бунинг орқасидан саноат, ишлаб чиқариш ва рақобат Европада кескин ривожланиб кетди ва улар ҳар томонлама ўсишга эришди», — дейди у.

Русланбек Давлетов ахборот алмашиниши кераклиги, бу эса билимни кучайтириши, лекин ноқонуний контент ҳар доим бўлишини айтди.

«Ноқонуний контент нима? Бу терроризмга бошловчи чорловлар, диний адоватларни қўзғатувчи, порнография ёки зўравонлик ҳақидаги материаллар. Ривожланган давлатларда буларнинг барчаси қонун билан тартибга солинган. Қонун билан ишласак, янглишмаймиз. Ахлоққа қарайдиган бўлсак, биз кўп миллатли мамлакатмиз, шу сабабли ҳамма бир хил ахлоқий стандартга қараб яшамайди. Кийинишимиз, юриш-туришимиз, ейдиган ва ҳатто ичадиган ичимлигимиз ҳам бошқача», — дея қўшимча қилди у.

2020 йил 3 декабрь куни адлия вазири Русланбек Давлетов Халқаро пресс-клубда «чекловлар тўғрисида камроқ гапириш керак. Чеклашга жуда устамиз, шу пайтгача буни жуда ҳам зўр уддалаганмиз», дея фикр билдирган эди.

Эслатиб ўтамиз, июль ойида Ўзбекистонда TikTok ва Тwitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди.

Аввалроқ Тошкент шаҳар ҳокими TikTok бир платформалиги, у ерда турли контент бор эканлиги, агар керакли контентларга кирилса, ҳеч қандай платформанинг зарари йўқлигини айтган эди.