Ўзбекистонда 11 декабрь куни Хитойдан 1 миллион доза ZF-UZ-VAC2001 вакцинаси келтирилди. Бу ҳақда Telegram’даги «Вакцинауз» канали хабар қилди.
Маълум қилинишича, вакцина Zhifei Longcom Biopharmaceutical компанияси томонидан бепулга юборилган.
«Вакцина республика аҳолисини эмлаш кўламини кенгайтириб, пандемия шароитида юртимизда оммавий иммунитет ҳосил қилишга хизмат қилади», — дейилади хабарда.
Эслатиб ўтамиз, 10 декабрь ҳолатига кўра, Ўзбекистонда жами 35 миллион 845 минг 59 доза вакцинадан фойдаланилган. Улардан:
- 1-босқич эмланганлар 18 миллион 197 минг 891 нафарни;
- 2-босқичда эмланганлар 11 миллион 679 минг 390 нафарни;
- 3-босқич эмланганлар 5 миллион 967 минг 778 нафарни ташкил қилган.
Ўзбекистонга охирги марта 24 сентябрь куни
ZF-UZ-VAC2001 (2 499 668 доза)
вакцинаси
олиб келинганди. Сентябрь ойининг якунида Ўзбекистонда
ZF-UZ-VAC2001
вакцинасининг 1 458 820 дозадан иборат дастлабки партияси ишлаб
чиқарилди. Октябрь ойида эса 1 219 510 дозалик иккинчи партия Санитария-эпидемиологик осойишталик ва жамоат саломатлиги хизматига
етказиб берилди.
Аввалроқ Ўзбекистонда 12–18 ёшли болаларнинг 500 мингдан ортиғи Pfizer вакцинаси билан эмлангани хабар қилинганди. Болаларни коронавирусга қарши эмлаш жараёни Фарғона (102 232 доза), Самарқанд (86 569 доза) ва Андижон (57 259 доза) вилоятларида юқори бўлган.