Тошкентдаги «Авиасозлар» бозорида истеъмолга яроқсиз гўшт аниқланди (видео)

Тошкентнинг Яшнобод туманида жойлашган «Авиасозлар» бозорида пойтахт ИИББ ва Миллий гвардия ходимлари томонидан 4 декабрь куни ўтказилган рейд давомида сотувчиларнинг бирида истеъмолга яроқсиз гўшт аниқланди. Бу ҳақда «Тошкент» телеканалида маълум қилинди.

Қайд этилишича, сотувчида ушбу гўшт келиш чиқиши ва сифатини тасдиқловчи тегишли ҳужжатлар ҳам бўлмаган.

«Гўшт биргина ҳиди билан санитария нормаларига жавоб бермаслиги билиниб турибди. Экспертиза натижаларидан сўнг ушбу ҳолат юзасидан якуний хулоса беришимиз мумкин. Истеъмолга яроқсиз гўштни сотишга алоқадор бўлган барча шахслар маъмурий жавобгарликка, айрим ҳолларда маҳсулотдан жабр кўрган харидорлар аниқланган тақдирда эса жиноий жавобгарликка ҳам тортилади», — деган Тошкент шаҳар ИИББ карантин хизмати бўлими командири Ғулом Элмуродов.

Сотувчининг сўзларига кўра, гўшт кабоб қилиш мақсадида олиб келинган. Музлаткич ишламагани сабабли ҳидланиб қолган.

Тошкент шаҳар ИИББ барча сотувчиларни гўшт харид қилишда огоҳ бўлишга, сотувчидан маҳсулот сифатини тасдиқловчи ҳужжат талаб қилишга чақирган.