«Толибон» Афғонистон собиқ ҳукуматининг ҳарбийлари ва амалдорларига нисбатан зўравонлик қилган барчани, жумладан, жангариларини ҳам қаттиқ жазолашини эълон қилди.

Фото: Anadolu Agency

«Мужоҳидлар амнистия тўғрисидаги фармонни бажаришга тўла содиқдир, собиқ маъмурият амалдорлари («Толибон»га нисбатан) аввалги қаршиликлари туфайли таъқиб қилинмайди», — дея маълум қилган «Толибон» ташқи ишлар вазирлиги матбуот котиби Абдулқаҳҳор Балхий.

«Агар Ислом Амирлигининг бирор-бир аъзоси амнистия тўғрисидаги фармонга бўйсунмаса, у қонун бўйича жазоланади», — деб ёзган Балхий Twitter’да.

Унинг сўзларига кўра, «ҳар бир воқеа чуқур ўрганилади, асоссиз миш-мишларни ҳақиқат сифатида қабул қилмаслик керак».

Август ойида Афғонистонда ҳукумат тепасига келган «Толибон» раҳбарияти собиқ ҳукумат амалдорларига умумий амнистия эълон қилганди. Толиблар давлат хизматчиларига расмий мурожаат қилиб улардан ўз иш жойларига қайтишни, ҳуқуқлари чеклаб қўйилишидан хавотирланмасликни сўраган эди. Ташкилотнинг расмий вакили «Толибон» аъзолари Кобул кўчаларида хавфсизликни таъминлаши ва собиқ амалдорларга ҳужум қилмоқчи бўлганларни ҳибсга олишини маълум қилган.

30 ноябрь куни Human Rights Watch (HRW) халқаро инсон ҳуқуқлари ташкилоти «Толибон»нинг 2,5 ойлик ҳукмронлиги даврида — 15 августдан 31 октябргача Ғазни, Ҳилмонд, Қандаҳор ва Қундуз вилоятларида собиқ ҳукуматнинг юздан ортиқ ҳарбий ва хизматчилари ўлдирилгани ҳақида маълумот эълон қилган. 

«Интерфакс»нинг Бахтар ахборот агентлигига таяниб хабар беришича, «Толибон» ноқонуний дарахт кесиш ва контрабандага қарши курашиш учун қуролли «китайи сабз» («яшил бўлинма») махсус бўлинмасини яратишга қарор қилган.

Қишлоқ хўжалиги, ирригация ва чорвачилик вазирлиги қошида ташкил этиладиган ушбу бўлинма қурол-яроғ ва техника билан таъминланади.

Ҳокимиятга келганидан бери «Толибон» ҳукумати ноқонуний дарахт кесиш ҳамда уларни Покистон ва Эронга контрабанда йўли билан олиб ўтиш масаласини бир неча бор кўтарган.