Ўзбекистон президенти Шавкат Мирзиёев Қозоғистон бош вазири Асқар Мамин ҳамроҳлигида Нур-Султон шаҳридаги Expо ишбилармонлик марказида жойлашган Рақамли ҳукумат офисига ташриф буюрди.

Фото: Президент матбуот хизмати

Ушбу муассаса 2021 йил сентябрь ойида очилган. Унинг таркибига Миллий таҳлил маркази, Рақамли трансформация маркази ва Миллий лойиҳа офиси киради.

Шавкат Мирзиёев ситуацион марказ имкониятлари билан ҳам танишди. Марказ барча маълумотлар базаларига уланади ва ҳудудлар билан яқиндан ҳамкорлик қилади, бу эса реал вазиятни онлайн равишда кўриш, масалан, мамлакатда эмлаш суръатлари тўғрисидаги маълумотларни кузатиб бориш имконини беради.

Ички ва ташқи савдо бўйича таҳлилий платформа имкониятлари намойиш қилинди. Унинг ёрдамида озиқ-овқат нархларини онлайн равишда мониторинг қилиш ва нарх-навонинг прогноз кўрсаткичларини шакллантириш мумкин. Бундан ташқари, офис негизида инновациялар ва аэрокосмик саноат соҳаларидаги лойиҳалар ишга туширилади.

Фото: Президент матбуот хизмати

Офис мутасаддиси Ўзбекистонда инсон капиталини ривожлантириш, IT-парклар ташкил этиш, дастурчилар тайёрлаш, давлат хизматларини онлайн кўрсатиш бўйича қилинаётган ишларни эътироф этиб, Қозоғистон ҳам шу йўлдан бораётганини айтди.

Шавкат Мирзиёев бу соҳада тажриба алмашиш, давлат хизматлари соҳасига сунъий интеллект технологияларини кенг жорий этиш, ҳар бир ҳаётий вазиятни таҳлил қилиб, одамларга қулайлик яратиш муҳимлигини таъкидлади.

Фото: Президент матбуот хизмати

Шу билан президент Шавкат Мирзиёевнинг Қозоғистонга давлат ташрифи якунланди.

Эслатиб ўтамиз, Шавкат Мирзиёев 5 декабрь куни Қосим-Жўмарт Тўқаевнинг таклифига биноан Қозоғистонга жўнаб кетганди. Уни Нур-Султонда Қозоғистон президенти кутиб олди.

Ташриф чоғида Оқ ўрдада Шавкат Мирзиёев ва Қосим-Жўмарт Тўқаев тор доирада музокаралар ўтказди ва икки томонлама ҳамкорликнинг муҳим вазифаларини белгилаб олди. Шунингдек, Шавкат Мирзиёев Нур-Султондаги «Ватан ҳимоячилари» монументига гул қўйди ва Ўзбекистон ва Қозоғистон ўртасида иттифоқчилик муносабатлари тўғрисидаги декларация имзоланди. Бундан ташқари, Шавкат Мирзиёев Нурсултон Назарбоев билан учрашди ва Ўзбекистоннинг Қозоғистондаги янги элчихонаси очилишида иштирок этди.