Ўзбекистонда автомобилларга ёнилғи қуйиш шохобчаларидаги бензин нархлари ҳақида маълумот берувчи Telegram-бот ишга туширилади. Бу ҳақда Монополияга қарши курашиш қўмитаси хабар берди.

Қайд этилишича, истеъмолчиларнинг хабардорлигини ошириш, жумладан, автотранспорт ҳайдовчиларига АЁҚШлардаги бензиннинг чакана нархлари тўғрисидаги маълумотларни олишда қулайлик яратиш ҳамда чакана нархларни назорат қилиш, мониторинг ўрнатиш ва бунда жамоатчилик иштирокини кенгайтириш мақсадида «Бензин нархи бот» Telegram-бот жорий этилмоқда.

«Батафсил маълумот тез кунларда ОАВ ҳамда расмий саҳифаларда берилади», дейилади қўмита хабарида.

Эслатиб ўтамиз, 1–15 ноябрь кунлари Ўзбекистон республика товар-хом ашё биржасида Аи-80 маркали автомобиль бензинининг ўртача сотилиш нархлари маҳсулотнинг бир тоннаси учун 8 миллион 690 минг сўмдан 10 миллион 129 минг сўмгача, яъни 17 фоизга ўсган эди. 17 ноябрдан бошлаб эса биржа савдоларида Аи-80 бензинининг нархида тушиш кузатилмоқда. Сўнгги маълумотларга кўра, маҳсулотнинг ўртача нархи бир тоннаси учун 10 миллион 129 минг сўмдан 8 миллион 101 минг сўмгача, яъни 20 фоизга пасайган.