Сентябрь бошларида Қашқадарё вилояти ҳудудидан ўтган автомобиль йўлларида мултирадарлар билан жиҳозланган патруль автомобиллари синов тариқасида ҳаракатланишни бошлагани тўғрисида хабар берилганди. ИИВ ЙҲХББ ахборот хизматининг маълум қилишича, мазкур синов амалиёти тугатилиб, махсус автомобиллар тўлиқ ишчи ҳолатга ўтказилган.
Қашқадарё вилояти ҳудудида йўл-транспорт ҳодисаларининг олдини олиш мақсадида тезликни ўлчаш радар қурилмалари билан жиҳозланган 5 та мултирадар махсус автомобиллари олиб келинган. Улар ўз иш фаолиятини вилоят ҳудудида мавжуд халқаро, давлат ва маҳаллий аҳамиятга эга бўлган йўлларда тезлик меъёр талабларини бузган ҳайдовчиларни аниқлаш мақсадида иш олиб бормоқда.
Таъкидланишича, мултирадар махсус автомобилларининг синов жараёнлари тугатилиб, 10 ноябрь кунидан бошлаб тўлиқ ишчи ҳолатга ўтган. 10—11 ноябрь кунлари вилоятда тезликни ошириш бўйича 600 дан ортиқ ҳолат қайд этилган.
Маълумот учун, Қашқадарё вилояти ҳудудида 2021 йилнинг ўтган 10 ойи давомида тезлик билан боғлиқ 274 та йўл-транспорт ҳодисаси қайд этилган бўлса, бунинг оқибатида 206 нафар фуқаро тан жароҳати олган, 116 нафар фуқаро вафот этган.
Эслатиб ўтамиз, 2020 йилнинг февралида Фарғонада ҳам махсус радарлар билан жиҳозланган патруль автомобиллари ҳаракатланишни бошлаганди. Ўшанда вилоятга мултирадар қурилмаси билан жиҳозланган 5 та Nexia-3 автомобили топширилган эди.
Изоҳ (0)