Sentabr boshlarida Qashqadaryo viloyati hududidan o‘tgan avtomobil yo‘llarida multiradarlar bilan jihozlangan patrul avtomobillari sinov tariqasida harakatlanishni boshlagani to‘g‘risida xabar berilgandi. IIV YHXBB axborot xizmatining ma’lum qilishicha, mazkur sinov amaliyoti tugatilib, maxsus avtomobillar to‘liq ishchi holatga o‘tkazilgan.
Qashqadaryo viloyati hududida yo‘l-transport hodisalarining oldini olish maqsadida tezlikni o‘lchash radar qurilmalari bilan jihozlangan 5 ta multiradar maxsus avtomobillari olib kelingan. Ular o‘z ish faoliyatini viloyat hududida mavjud xalqaro, davlat va mahalliy ahamiyatga ega bo‘lgan yo‘llarda tezlik me’yor talablarini buzgan haydovchilarni aniqlash maqsadida ish olib bormoqda.
Ta’kidlanishicha, multiradar maxsus avtomobillarining sinov jarayonlari tugatilib, 10-noyabr kunidan boshlab to‘liq ishchi holatga o‘tgan. 10—11-noyabr kunlari viloyatda tezlikni oshirish bo‘yicha 600 dan ortiq holat qayd etilgan.
Ma’lumot uchun, Qashqadaryo viloyati hududida 2021-yilning o‘tgan 10 oyi davomida tezlik bilan bog‘liq 274 ta yo‘l-transport hodisasi qayd etilgan bo‘lsa, buning oqibatida 206 nafar fuqaro tan jarohati olgan, 116 nafar fuqaro vafot etgan.
Eslatib o‘tamiz, 2020-yilning fevralida Farg‘onada ham maxsus radarlar bilan jihozlangan patrul avtomobillari harakatlanishni boshlagandi. O‘shanda viloyatga multiradar qurilmasi bilan jihozlangan 5 ta Nexia-3 avtomobili topshirilgan edi.
Izoh (0)