Наманганда «Янги Ўзбекистон» боғи барпо этилади, дея хабар бермоқда вилоят ҳокимлиги матбуот хизмати.
Маълум қилинишича, Наманганда «Долзарб 40 кунлик» акцияси доирасида Давлатобод туманида қурилиши бошланган Янги Наманган шаҳарчаси бўйлаб дарахт ўтқазилди.
Жараёнда Наманган вилояти ҳокими Шавкатжон Абдураззоқов, нуронийлар, маҳалла фаоллари, корхона, ташкилот раҳбарлари, ёшлар ва кенг жамоатчилик иштирок этди.
Маълумот ўрнида, Давлатобод туманининг «Юксалиш» ҳамда Тўрақўрғон туманининг «Еттикон» маҳаллалари ҳудудидан яшил макон учун 1 минг 371 гектар ер ажратилган. Бу ҳудудда Янги Наманган шаҳарчасини барпо этиш учун қурилиш ишлари аллақачон бошлаб юборилган.
«Майдон фақатгина бинолардан иборат бўлган жой эмас, балки экологик мусаффолик мавжуд бўлган ҳудудга айланади. Шу боис ҳам«Яшил ҳудуд» 65 гектарлик «Янги Ўзбекистон» боғи барпо этилмоқда.
Бугунги дарахт экиш акциясида йиғилганлар мазкур боғ лойиҳаси тақдимоти билан ҳам танишишди ва боғга илк дарахтларни ўтқазишди», – дейилади ҳокимлик хабарида.
2026 йилга бориб Янги Наманган шаҳарчаси бир миллион аҳоли истиқомат қиладиган йирик ва яшил шаҳарга айланиши кўзда тутилган.
Эслатиб ўтамиз, аввалроқ Тошкентда ҳам «Янги Ўзбекистон» боғи қуриб битказилган эди.
Изоҳ (0)