Ўзбекистон футбол ассоциацияси (ЎФА) тартиб-интизом қўмитасида йиғилиш бўлиб ўтди. Унда бир қатор футболчи ҳамда расмийларга нисбатан тартиб-интизом чоралари белгиланди.
Ўзбекистон Кубоги нимчорак финал доирасидаги «Сўғдиёна» – «Насаф» учрашувида «Сўғдиёна» жамоасининг бош мураббийи Улуғбек Бақоев ўйин давомида бир неча бор ҳакамлар жамоаси қароридан ўз норозилигини қўпол тарзда билдирган. Учрашув якунидан сўнг эса «Насаф» жамоасининг 92-рақамли футболчиси Умар Эшмуродов билан ўзаро тортишиб қолиб, оммавий жанжал келиб чиқишига сабаб бўлган. Бу эса учрашув якунидан сўнг мухлислар томонидан учрашув расмийлари ва футболчиларига ҳар хил буюмлар улоқтирилишига сабаб бўлган. Тартиб-интизом қўмитасининг қарорига кўра, «Сўғдиёна» жамоаси вакиллари Улуғбек Бақоев ҳамда Баҳодир Насимов, шунингдек, «Насаф» клуби футболчиси Умар Эшмуродов иккита ўйинга дисквалификация қилинди ва уларга нисбатан жарима интизом чораси қўлланилди.
Ўзбекистон Кубоги чорак финал босқичида «Сўғдиёна» — «Насаф» футбол клублари ўртасидаги учрашув вақтида «Сўғдиёна» футбол клуби ишқибозларини мухлислик маданиятидан четга чиқиб, стадионга турли буюмларни улоқтиргани, стадион ва унга ёндош ҳудудларда тартибсизликлар келтириб чиқаргани, жамоа расмий шахслари томонидан стадионда тартибсизликлар келиб чиқишига сабаб бўлган ножўя хатти-ҳаракатлар содир этилгани учун ЎФА Интизом кодексининг 5.4-бандларига мувофиқ «Сўғдиёна» футбол клубига нисбатан Суперлиганинг 25-тур доирасидаги «Сўғдиёна» — «Насаф» учрашувини томошабинларсиз ўтказиш интизом чораси қўлланилди.
Ўзбекистон Суперлигасининг 23-тури доирасидаги «Андижон» — «Насаф» учрашувида меҳмонлар бош мураббийи Рўзиқул Бердиев ўйиннинг 70-дақиқасида ҳакамлар жамоасидан ўз норозилигини билдириб, жамоани майдондан олиб чиқиб кетмоқчи бўлгани, лекин бир неча дақиқалик музокаралардан сўнг у билан учрашувни давом эттиришга келишилгани, натижада Интизом кодексининг бир неча бандларини бузилгани аниқланди. Бундан ташқари, Рўзиқул Бердиев учрашувнинг 90+3 дақиқасида мухлисларга нисбатан ножўя сўзлар ишлатгани, ушбу ҳолат билан оммавий ахборот воситалари орқали кенг жамоатчилик эътирозига сабаб бўлгани учун Рўзиқул Бердиев иккита ўйинга дисквалификация қилинди ва унга нисбатан жарима интизом чораси қўлланилди.
Таъкидланишича, қўмитага «Бунёдкор» футбол клуби томонидан хат келиб тушган. Унда «Бунёдкор» клуби Суперлиганинг 22-тур доирасидаги «Навбаҳор» — «Бунёдкор» учрашувида «Навбаҳор» жамоаси футболчиси Сардор Теляков учрашувнинг 19-дақиқасида рақиб ўйинчисига нисбатан ўйин қоидасини жиддий тарзда бузгани, лекин бу вазиятда ҳакам Теляковга нисбатан ҳеч қандай огоҳлантириш ёки четлатиш қўлламаганлиги таъкидланган. «Бунёдкор» тартиб-интизом қўмитасидан Сардор Теляков нисбатан тегишли чора кўришни сўраган.
«2021 йилги мавсумда Ўзбекистон ПФЛ томонидан ўтказиладиган мусобақалар Регламенти»нинг 16.3-бандида белгиланган муддатда киритилмаган ҳамда учрашув қайдномасида қайд этилмаган шикоят ёки эътирозлар кўриб чиқилмаслиги қайд этилгани учун ЎФА Тартиб-интизом қўмитаси «Бунёдкор» футбол клубининг мазкур шикоят хатини кўриб чиқилмасликни лозим топган.