Терма жамоага чақирилган Месси, «Барселона»да янги қоидаларни жорий қилган Хави, Британия империяси ордени билан тақдирланган Рэшфорд. Энг сўнгги спорт янгиликлари

Дунё ва ўзбек спортига оид 9 ноябрь кунининг энг муҳим хабарлари дайжести билан танишинг.

Ўзбекистон

Тошкент шаҳрида 12—14 ноябрь кунлари самбо бўйича катталар ўртасида Жаҳон чемпионати ўтказилади. Мазкур мусобақада Ўзбекистон терма жамоаси сафида қуйидаги таркибда иштирок этади:

Эркаклар:

• -58 кг: Лутфулла Сайдаматов
• -64 кг: Давлатжон Ҳамроев
• -71 кг: Сарбон Эрназаров
• -79 кг: Улуғбек Раҳмонов
• -88 кг: Ихтиёр Эшмуродов
• -98 кг: Нодиржон Мирхолиқов
• +98 кг: Нурбек Тўраев.

Аёллар:

• -50 кг: Сабина Давлатова
• -54 кг: Маликабону Мирзаева
• -59 кг: Ибодатхон Агажанова
• -65 кг: Сарвиноз Эсанова
• -72 кг: Шоҳиста Амирова
• -80 кг: Мадинабону Салоҳиддинова
• +80 кг: Юлдуз Муҳаммадиева

Жанговар самбо:

• -58 кг: Баҳодир Боқиев
• -64 кг: Ойбек Солиев
• -71 кг: Истам Қудратов
• -79 кг: Фурқат Рўзиев
• -88 кг: Соҳибжон Ҳасанбоев
• -98 кг: Рўзимурод Йўлдошев
• +98 кг: Ҳакимжон Исмоилов

19-турнинг қолдирилган ўйинига ҳакам тайинланди

11 ноябрь куни футбол бўйича Ўзбекистон Суперлигасининг 19-туридан ўрин олган қолдирилган учрашув бўлиб ўтади. Унда «Сурхон» ўз майдонида «Насаф» билан баҳс олиб боради. Профессионал футбол лигаси (ПФЛ) мазкур босқичда фаолият олиб борадиган расмийларни эълон қилди.

Хави «Барселона»да янги қоидаларни жорий қилди

«Барселона» бош мураббийи Хави жамоада янги қоидаларни жорий қилди.

Эндиликда футболчилар машғулот бошланишига бир ярим соат қолганда клуб базасига етиб келиши керак. Бу вақт ичида улар нонушта қилиши, машғулотларга тайёргарлик кўриш ва индивидуал машқларни бажариши лозим. Мураббийлар штаби аъзолари эса машғулотлар бошланишидан 2 соат олдин клуб базасида бўлиши шарт.

Хави, шунингдек, қоидабузарликлар учун жарима тизимини ҳам қайтарди. Такрорий ҳуқуқбузарликлар учун жарималар миқдори ошиб бораверади. Ушбу қоида Луис Энрике клубни тарк этганидан сўнг бекор қилинганди.

Бундан ташқари, футболчилар яхши имижда бўлиши ва оммага ўрнак бўлиши керак.

Рэшфорд Британия империяси ордени билан тақдирланди

«Манчестер Юнайтед» ҳужумчиси Маркус Рэшфорд Британия империясининг кавалер ордени билан тақдирланди.

Англиялик ҳужумчи 2020 йил октябрь ойида болалар учун бепул овқатланиш кампаниясини ташкил қилгани учун мукофотланган.

9 ноябрь куни Британия тахти вориси шаҳзода Уильям Виндзор қасрида футболчига орденни топширди.

Рамос «ПСЖ»нинг умумий гуруҳ машғулотларига қўшилди

«ПСЖ» ҳимоячиси Серхио Рамос Париж клубининг жамоавий машғулотларига қўшилди. Бу ҳақда Le Parisien хабар берди.

Қайд этилишича, испаниялик футболчи Париж клубининг ёш футболчиларига қарши ўйинда иштирок этган.

Маълумот учун, Рамос ёзда «ПСЖ»га ўтганидан бери оёғидаги жароҳат сабаб ҳали янги жамоасида дебют қилгани йўқ.

Погба йил охиригача майдонга туша олмаслиги мумкин

«Манчестер Юнайтед» ярим ҳимоячиси Пол Погба Франция терма жамоаси сафида жароҳат олди.

28 ёшли футболчининг сон мушаклари шикастланган ва терма жамоа ихтиёрини тарк этган.

Дастлабки текширувга кўра, футболчи 8—10 ҳафта давомида майдонга туша олмайди. Шу тариқа Погба йил охирига қадар сафдан чиққан бўлиши мумкин.

Месси Бразилияга қарши ўйинда майдонга тушиши мумкин

Аргентина терма жамоаси ҳужумчиси Лионель Месси ЖЧ—2022 саралаш босқичи доирасидаги Уругвай ва Бразилияга қарши ўйинларда иштирок этиши мумкин.

Get French Football News’нинг хабар беришича, «ПСЖ»нинг сўнгги икки ўйинини ўтказиб юборган 34 ёшли ҳужумчи терма жамоа ихтиёрига етиб келган ва машғулотларга киришган.

Қайд этилишича, терма жамоа тиббий штаби Мессига 17 ноябрь куни Бразилияга қарши ўйинни тўлиқ ўтказишга рухсат берган. Шунингдек, у 13 ноябрь куни Уругвайга қарши учрашувда ҳам майдонга тушиши мумкин.

Аввалроқ Мессининг жароҳат олгани ва тикланиш муддати узоқ вақт давом этиши мумкинлиги ҳақида хабар берилганди.