Тинчлик бўйича Нобель мукофотининг энг ёш лауреати Малала Юсуфзай турмушга чиқди

Покистонлик ҳуқуқ ҳимоячиси, 2014 йилда тинчлик бўйича Нобель мукофоти билан тақдирланган Малала Юсуфзай турмушга чиқди. Бу ҳақда унинг ўзи Twitter’да маълум қилган.

«Бугун ҳаётимдаги унутилмас кун. Ассер билан умримизнинг охиригача бирга бўлиш учун турмуш қурдик», — деб ёзган Нобель лауреати ҳамда постга турмуш ўртоғи билан тушган фотосуратларни илова қилган.

24 ёшли Юсуфзайнинг сўзларига кўра, жуфтлик кичик тўй қилган. Маросим ислом анъаналари бўйича икки ёшнинг оила аъзолари иштирокида қиз яшайдиган Бирмингем шаҳри (Буюк Британия)да бўлиб ўтган.

Юсуфзай 11 ёшида интернет тармоғида блог юрита бошлаган пайтда танилган. Блогида қиз ўзи туғилиб ўсган Хайбер-Пахтунхва вилоятининг Сват туманида «Толибон» ҳаракатининг шариат қонунларини ўрнатишга уринишларини танқид қилган. 2012 йилнинг 9 октябрь куни Малала мактабдан уйига қайтаётганда, унга қуролли жангарилар ҳужум қилган, қиз боши ва бўйнидан жароҳатланган. Реабилитация курсидан ўтгач, Юсуфзай 2013 йилда ҳуқуқ ҳимоячилигига қайтди.

2014 йилда Юсуфзай Тинчлик бўйича Нобель мукофоти билан тақдирланди ва тарихдаги энг ёш лауреатга айланди. Илгари бу мақомга 1915 йилда 25 ёшида Нобель олган инглиз физиги Лоуренс Брегг эга бўлганди.

Маълумот учун, 2021 йилда тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.